ئێڤاریا شەمبی 18 ئادارا 2023، مەسرور بارزانی، سەرۆکێ حکومەتا هەرێما کوردستانێ، د چوارچوڤێ کۆمبوونەکێ دا دگەل باڵیۆز، کۆنسۆڵ و نوونەرێن وەلاتان دا ڕاگەهاند،”دەربارەی ڕەوشا نوکە و پەیوەندییێن مە دگەل عیراقێ، ئەز یێ دلخۆشم کو پشتی چەندین کۆمبوونان دناڤبەرا حکومەتا هەرێما کوردستانێ و حکومەتا فیدڕال دا، ئەم گەهشتیە چەند ڕێککەفتنێن دەستپێکی، ل دوماهی کۆمبوونا خۆ ژی دا دگەل سەرۆک وەزیرێن فیدڕال ئەم ڕێککەفتین کو ناکوکی و جێوازییێن خۆ ب گۆهڕین بۆ دەرفەتان ژ بۆ هندێ گەلەک ژ وان ئاریشەیێن هەلاویستی چارەسەر بکەین و پلانان ب دانین ژ بۆ هندێ کا دێ چاوا شێین پێکەڤە پێنگاڤان هاڤێژین و پێکڤە کار کەین، ئەز گەلەک یێ گەشبینم کو هەمی ئەو ئاریشەیێن مە هەین تا نوکە چارەسەر بکەین ئەڤجا چ د گرێدای بودجەیێ بن یان ژی یاسایا نەفت و گازێ، تەناهیێ یان ژی د هەر بیاڤەکێ دی دا بن کو ئەم دشێین پێکڤە کار بکەین و خزمەتا هەمی عیراقێ بکەین.”
دەربارەی ڕەوشا ناڤخۆ یا هەرێما کوردستانێ، سەرۆکێ حکومەتێ بۆ باڵیۆ و کۆنسۆل و نوونەرێن وەلاتان گوت:” وەکی هوون دبینن و دزانن ڕەنگە هندەک نە لێکتێگەهشتن یێن هەین، بەلێ ئەم یێ بزاڤان دکەین کۆنترۆلێ ل سەر ئەوان ئاریشەیان ژی بکەین، ب ڤێ هەلکەڤتێ ل دوو ڕۆژێن بهێت دا ، دێ مە سەرێ سالا نوو هەبیت و من ژی دێ گوتارەک هەبیت و د گوتارا خۆ دا ژی، ئەز دێ داخوازێ ژ جێگرێ سەرۆک وەزیران و تیمێ ئێکەتیێ کەم دا کو بزڤرنە ڤە جڤاتا وەزیران و جڤاتێ وەکو جهەک بۆ چارەسەرکرنا ئاریشەیان بکار بینن، ئەم دشێین هەمی ئاریشەیان چارەسەر بکەین ئەگەر مە حەزا چارەسەریێ هەبیت و ئەز د شێم بێژمە هەوە کو بێ گومان من ئەو مەرەم و ئەو حەزە یا هەی دا کو هەمی ئاریشەیان چارەسەر بکەم.”
مەسرور بارزانی، سەرۆکێ حکومەتا هەرێما کوردستانێ د بەردەوامیا ئاخفتنا خۆ دا گۆت:” پرسەکا دی هەیە کو من دڤێت هندەک زانیارییێن نوو ل سەر ب دەمە هەوە، وەکی هوون دزانن چەند ڕۆژان بەری نووکە بابەتێ ڕوودانا کەڤتن و ژناڤچوونا هێلیکۆپتەران هەبوو، کو هندەک نە ڕوهنی یا هەی کا دەربارەی ئەوی بابەتی چ ڕوودایە، چەند ڕۆژەکان پشتی کو ئەو ڕوودانە روودای، هەسەدێ ڕاگەهاندنەک بەلاڤکر و تێدا دیارکربوو، کو هێلیکۆپتەر و هەمی ئەو کەسێن دناڤدا ژیانا خۆ ژ دەستدای ب سەر ئەوان ڤەنە. سەرۆکێ حکومەتێ دیارکر،” فەرمانگەهێن مە یێن تەناهی و هەۆالگیری ژناڤچوونا ئێک هێلیکۆپتەرێ یا پشتڕاسکری، لێ دەربارەی فڕۆکا دووێ ئەم نزانین کا چ روودایە و مە زانیاری ل سەر نینن، ئەم چاڤێن خۆ ل سەر نا گرین و رەت ناکەین کو ژناڤچوویە یان نە چونکی مە پێزانین ل سەر نینن، مە ڤەکۆلینەک دەستپێکریە داکو بزانین چنە و بووچی ل وێرێ بوون، ئەڤە ئەو هێلیکۆپتەرە بوون کو د بنەرەتدا ژ لایێ گرۆپەکێ دناڤ ئێکەتییێ دا هاتبوونە کڕین، بەلێ بووچی گەهشتینە دەستێ هەسەدێ؟ ئەم ڤێ چەندێ نزانین، و بوچی ل وی جهی بوون و بوچی ل وی جهی کەڤتینە خوارێ ئەڤێ چەندێ ژی پێدڤی ب ڤەکۆلینێن زێدەتر هەیە، ئەم یێ دگەل هێزێن هەڤپەیمانێن نێڤدەولەتی و وەلاتێ عیراقێ کار دکەین دا کو ڤەکۆلینێن زێدەتر دەربارەی وێ ڕوودانێ بکەین و بزانین بووچی ئەو هێلیکۆپتەرە ل سەر وان دەڤەراندا فڕینە بێی کو چ مۆلەتەک هەبیت، هێشتا گەلەک تشت ماینە بزانین و هیڤیدارم کو ئەم بشێین بەرسڤەکا ڕۆهن بۆ خەلکێ مە و بۆ هەوە هەمیان ب دەستڤە بینین.
