سەرۆک کۆمارێ عیراقێ گەهشتە نیویۆرک

لەتیف رەشید، سەرۆککۆمارێ عیراقێ گەهشتە نیویۆرک و دێ  پشکداریێ د  کۆنگرەیێ ئاڤ و ھەوای دا کەت.

نڤیسینگەها ڕاگەهاندنا سەرۆکایەتییا عیراقێ د ڕاگەهاندنەکێدا ئاماژە کریە، لەتیف ڕەشید، سەرۆککۆمارێ عیراقێ ب مەرەما پشکداریکرن د کۆنگرەیێ ئاڤ و هەوای دا گەهشتە نیویۆرک.

دیارکریە ژی، فوئاد حسێن، وەزیرێ دەرڤە و نزار ئامێدی، وەزیرێ ژینگەهێ و ئەسعەد عیدانی، پارێزگارێ بەسرا دگەل سەرۆککۆمارێ عیراقێنە بۆ سەرەدانا نیویۆرک.

کۆنگرەیێ ئاڤ و هەوای ل نیویۆرک، ژ لایێ نەتەوەیێن ئێکگرتی ڤە هاتیە ڕێکخستن و دێ ل 22 ئادارێ دەستپێکەت و تا 24 ئادارێ دێ بەردەوام بیت.

ژمارەیەکا سەرکردێن جیهانێ دێ پشکداریێ د کۆنگرەیێ ئاڤ و هەوای دا کەن ئەوێ بڕیارە ل نیویۆرک بڕێڤە بچیت و دێ پرسێن تایبەت بۆ بەرهەنگاربوونا گۆهڕینێن ب سەر ئاڤ و هەوای دا دهێن  گوتوبێژ کەن.