وه‌زاره‌تا دارایى و ئابوورییا حكومه‌تا هه‌رێما كوردستانێ دراگه‌هاندنه‌كێدا دیاركر، وه‌زیرێ دارایى پێشتر دووپاتكربوو كو ئه‌و 400 ملیار دیناره ب تنێ بۆ مووچه‌ى هاتینه و بۆ چ بابه‌تێن دى ناهێنه خه‌رچكرن.
ده‌قێ راگه‌هاندنێ:
ل سه‌ر وان گه‌نگه‌شه‌یێن تایبه‌ت ب بابه‌تێ 400 ملیار دیناران كو ل چه‌ند سایت و په‌یج و ده‌زگه‌هێن راگه‌هاندنێ به‌لاڤبووینه، وان ب پێدڤى دیت ئه‌ڤێ روونكرنێ ب رایا گشتى بده‌ن.
1 – ئه‌و 400 ملیار دیناره ژلایێ جڤاتا وه‌زیرێن عیراقێڤه بۆ هه‌یڤێن چریا دووێ و كانوونا ئێكێ یێن سالا 2022ێ بریار ل سه‌ر هاتبوودان، لێ ژبه‌ر چه‌ند ئه‌گه‌ران هاتنه پاشخستن و ل ده‌ستپێكا ئه‌ڤێ هه‌یڤێ چو‌و‌نه سه‌ر هژمارا بانكییا وه‌زاره‌تا دارایى و ئابوورییا هه‌رێما كوردستانێ.
2 – وه‌زیرێ دارایى و ئابوورییێ حكومه‌تا هه‌رێمێ رۆژا 14 ئادارێ د داخویانییه‌كێدا راگه‌هاندبوو، ئه‌و 400 ملیار دیناره ب تنێ بۆ مووچه‌ى هاتینه و بۆ چ بابه‌تێن دى ناهێنه خه‌رجكرن، و مووچه‌یێ هه‌یڤا ئادارێ ژى دێ بێى ئاریشه هێته به‌لاڤكرن.
3 – دووپات دكه‌ین ئه‌و رێژه‌یا هه‌یڤانه یا كو ژ وه‌زاره‌تا دارایى و ئابووریا هه‌رێمێ بۆ سلێمانییێ دهاته خه‌رجكرن، دێ خه‌رج كه‌ین وچ گوهۆرین ب سه‌ردا نه‌هاتینه.
4 – ژبه‌ر داكه‌ڤتنا داهاتێ په‌ترۆلێ كو بۆ مووچه‌یێ هه‌یڤا شوباتێ ب تنێ 340 ملیار دینار ژ وه‌زاره‌تا سامانێن سرۆشتى چووینه سه‌ر هژمارا وه‌زاره‌تا دارایى و ئابوورى دگه‌ل 400 ملیار دینارێن به‌غدا، بۆ مووچه‌یێ هه‌یڤا شوباتێ هاتینه ته‌رخانكرن و ئه‌و ڤالاهییا درووست بووى ژى دێ ب رێكا داهاتێ ناڤخۆ پر بیت هه‌روه‌كو چه‌وا پێشتر پر بووی.
