ڕاگەهاندنا زانکۆیا دهۆکێ ڕاگەهاند، ب مەرەما دانانا سیاسەتەکا بکارئینانا زمانی ل زانکۆیا دهۆک و هەروەسا دروستکرنا رێبەرەکێ رێنڤێسا کوردی، ئەڤرۆ رێکەڤتی 3 نیسانا 2023، سەرۆکێ زانکۆیا دهۆک د. داود سلێمان ئەتروشی ل گەل پشکێن زانستی یێن گرێدای زمانان کۆمبوو و تێدا دانوستاندن ل دۆر پرۆژێن هەیی یێن پێشڤەبرن و بلندکرنا ئاستێ بکارئینانا زمانان ل زانکۆیا دهۆک و ب تایبەتی زمانێ کوردی هاتنە ئەنجامدان.
د کۆمبوونێ دا و ب ئامادەبوونا د. ئەبۆ عوبیدە عەبدوللا زیاب، راگرێ کولیژا زمانان و سەرۆک پشکێن زمانێ کوردی، ئنگلیزی، عەرەبی و وەرگێرانێ ل کولیژا ناڤبری، ل گەل سەرۆک پشکێن کوردی و ئنگلیزی ل کولیژا پەروەردا بنیات، رێڤەبەرێ سەنتەرێ زمانان و رێڤەبەرێ راگەهاندنا زانکۆیا دهۆک، سەرۆکێ زانکۆیا دهۆک باس ئاریشێن گرێدای بکارئینانا زمانان و ب تایبەتی زمانێ کوردی کر و دیارکر “پتر ژ هەر مللەتەکی، ئەم پێدڤی ب هندێینە کو گرنگیدان ب زمانی ببیتە ئێک ژ ئارمانجێن سەرەکی، د هەر بوارەکێ زمانی دا پێدڤیە مە پرۆژێن پێشڤەبرنێ هەبن، پێدڤیە مە سیاسەتەکا زەلال و رێکوپێکا بکارئینانا زمانی ل زانکۆیا دهۆک هەبیت، ئەڤە ئەرکێ پشکێن گرێدای زمانانە و ب تایبەتی زمانێ کوردی“.
د لایەکێ دی یێ کۆمبوونێ دا، دانوستاندن ل دۆر رێنڤێسا زمانێ کوردی و چاوانیا دروستکرنا رێنڤێسەکا ئێکگرتی هاتنە کرن. هەروەسا ئەو پێنگاڤێن ژ لایێ کولیژا زمانان ڤە هاتینە هاڤێتن بۆ دروستکرنا رێبەرێ رێنڤێسا کوردی هاتنە باسکرن، کو د پلان دایە ئەڤ رێبەرە ب دویماهی بهێت و بهێتە چاپکرن و بەلاڤکرن و کۆرسێن راهێنانێ بۆ هەمی کولیژ و یەکەیێن کارگێری و زانستی و رەوشەنبیری ل دۆر بکارئینانا ڤی رێبەری بهێنە ڤەکرن.
هەر د کۆمبوونێ دا، هژمارەکا بابەتێن دی یێن گرێدای زمانی هاتنە باسکرن، وەکو؛ دروستکرنا کۆرسێن ستاندارد بۆ فێرکرنا زمانێن جودا، ئەنجامدانا تاقیکرنێن شیانێن زمانێن جودا، گرنگیا هەماهەنگیێ د ناڤبەرا پشکێن گرێدای زمانێن جودا دا ل زانکۆیا دهۆک و هەروەسا ل سازیێن پەیوەندیدارێن دەرڤەی زانکۆیێ، رێک و شێوازێن پێشکێشکرنا خزمەتان بۆ جڤاکی د ڤی بواری دا. پشتی هەر ئێک ژ ئامادەبوویان باس ل هزر و پشنیاز و پرۆژێن خۆ د ڤی بواری دا کرین، پلان هاتە دانان کو هژمارەکا کۆمبوونێن دی یێن تایبەت ب زمانێن دەستنیشانکری ڤە بهێنە ئەنجامدان.
