سازیا (DAAD) یا ئەڵمانى دێ هاریکارییا وەزارەتا خواندنا بلند و ڤەکۆلینێن زانستی یا هەرێما کوردستانێ کەت بۆ بەرفرەهکرنا پشتەڤانییا نێڤدەولەتی، ب هەماهەنگی دگەل کۆمسیۆنا ئەوروپا ل برۆکسڵ، ب ئارمانجا پشتەڤانیکرنا سکتەرێ خواندنا بلند و بجهئینانا بۆلۆنیا پرۆسێس ل زانکۆیێن هەرێما کوردستانێ و گرنگیدان ب خواندنا تەکنیکى و پیشەیی.
وەزارەتا خواندن و ڤەکۆلینێن زانستی ڕادگەهاندیە، ئەڤرۆ دووشەمبی 3ی نیسانا 2023، د.ئارام محەمەد قادر، وەزیرێ خواندنا بلند و ڤەکۆلینێن زانستى پێشوازی ل (Christian Huelshoerster) بەرپرسێ پێشڤەبرنا پرۆگرامێن سازیا (DAAD) ئەڵمانى ل وڵاتێن باشوورێ نیڤا ئەردی و (Christian Strowa) بەرپرسێ پشکا لێکگۆهارتنا زانستی و پەیوەندىیێن نێڤدەولەتی و جوان خاڵس ڕێڤەبەرا پرۆگرامێن وێ سازییێ ل هەولێر کر.
د هەڤدیتنێدا وەزیرێ خواندنا بلند و ڤەکۆلینێن زانستی سوپاسییا هاریکاری و هەماهەنگییا سازییا (DAAD) ئەڵمانى کر و هیڤی خواست هاریکاری و هەماهەنگی د بەردەوام بن بۆ کارێ هەڤپشک.
د پشکەکا دی یا کۆمبوونێدا گوتوبێژ ل سەر چەند تەوەر و بابەتێن گرنگ هاتە کرن، ب تایبە رێیێن قوناغا داهاتی بۆ هەماهەنگییا وەزارەتا خواندنا بلند و ڤەکۆلینێن زانستی دگەل سازییا (DAAD) یا ئەڵمانى بۆ بجهئینانا بۆلۆنیا پرۆسێس ل زانکۆیێن هەرێما کوردستانێ و گرنگیدانا خواندنا تەکنیکی و پیشەیی، د وی چوارچووڤەی ژی دا بەرپرسێن (DAAD) ئەڵمانى پلان و هاریکارییا خۆ بۆ پێشڤەبرنا کەرتێ خواندنا بلند و زانکۆیێن هەرێما کوردستانێ دوپاتکر.
د پشکەکا دی یا کۆمبوونێ دا گوتوبێژ دەربارەی پێکئینانا تۆرا هەماهەنگی و هەڤکارییا هەرێما کوردستانێ دگەل سازییێن هەر ئێک ژ وەلاتێن ئەڵمانیا، هۆڵەندا، فەرەنسا کر، دگەل دروستکرنا پەیوەندیان دگەل سازییێن حکومی یێن وەلاتێ ئەڵمانیا کو د تایبەتن ب سەرپەرشتیکرنا خواندنا تەکنیکی و پیشەی ژ بۆ هندێ کو بشێن هاریکارییا هەرێما کوردستانێ بکەن د پێشڤەبرنا خواندنا تەکنیکی و پیشەیی دا.
