کۆڤان حسێن
ئەگەر پەرگارا مرۆڤی ل بار نەبیت ھندەک جارا داینا خودێ ژی بۆ مرۆڤی ل شوینا نەعمەت بیت، دبیتە بەرلا و نەفرەت.
سەردەمەکی ژ بەری نوکە بەرێز نێچیرڤان بارزانی ل ئەمریکا دیارکر، کو کورد ب پترۆلیّ ھاتنە سۆتن و سەد سالا بەھرا مە ژ پترۆلێ ئاگر و ئاسن و وێرانی بوو، ئەڤجا دوورا ئاڤێ یە دا مە پێ ب خەندقینن، ئەڤ وەلاتە ئێخسیرێ جۆگرافیایەکا ستەمکارە و ھەلویستێ ھەمی دوستان ژی ھەرگاڤ ڕاستی ڤێجا ڕاستیا تەحل دبیت.
نەبوونا سەروەریەکا کوردستانی ھەمی سامانێ مە بێ ھودەییە یان بۆ دژمنکاریا مەیە یان ژی کێمتر ژ نیڤێ بەھرا مەیە، دانەکا خودای یە ل ھەر چار پارچەیێن کوردستانێ نەفت و گاز مشەیە و زۆرە لێ بڕیارا میتینگەھییا داگیرکەران ھەر زوو ئەڤ چەندە ب مەترسی زانیە، پشتی دیاربوونا پترۆلێ ل کوردستانێ یان ویلایەتا موسلێ 180 پلەیان بووچوونا داگیرکەرێن ئینگلیز ھاتە گۆھاڕتن و بەڕژەوەندیێن خوە یێن ئیمپریالی بلندتر دیتن ژ ئازادیا مللەتەکێ ل سەر ئاخا خوە، ھەبوونا ئاڤێ و نەفتێ ل وەلاتێ مە ھەر ڕۆژ گەفە ل سەر مە یان دێ پێ ھێینە سۆتن یان ژی خەندقاندن و ھندی کوردستانێ بڕیارا سیاسیا سەربەخۆ نەبیت، بڕیارا سەرخۆبوونا ئابووری ژی ھەمی گاڤێ دێ سەقەت بیت یان دێ ب پلان و بەڕنامێ داگیرکەران بیت، سامانێن سروشتی یێن وان وەلاتێن بێ سەروەریەکا ژ ڕاستی مینا ئەفریقیا و ھندەک وەلاتێن ئەمریکا بوویە بەلا و مەینەت بۆ وان گەلان، دیارە بۆ کوردستانێ ژی ھەمان بڕیار ھەیە, دا کو مللەتێ کورد خودانکاریا سامانێ خوە نەکەتن یان ژی دبن توندترین گڤاشتنێ ڤە بیت و ھەمی گاڤێ وەک چەکەکێ برسیکرنێ دێ د دانوستاندێن سیاسی دا ئامادە بیت.
قەت ھەڤپشکێن سیاسی یێن کوردستانێ دڤان وەلاتاندا د ئامادە نین چ جارەکێ ب چاڤ بەڕژەوەندیا کوردستانێ د بازاڕان دا درست بکەن، ھەمی سامانێ کوردستانێ 600 سالا دچوو (باب العالی)، لێ ئەوان ئەڤ وەلاتە ھێژای مزگەفتەکێ ژی نە دیتن ھێژای پرەکێ تیمارگەھەکێ نەدیت، زۆر جارا ئەم خوە جەلدە ددەین و دبێژین نە ئێک ڕێزیا مە ئەگەرە، دبیت دگوشەیەکێ دا ئەڤە یا دروست بیت لێ ھەمان میرنشینێن عەرەبان ژی ئێک ڕێز نەبوون و بوونە 7 دەولەت ب سایا سەرێ پترۆلێ، کیانێن سیاسی و چەترەکا بەڕەڤانییێ بۆ درستکرن, دەربارەی کوردستانێ چ بھانەیەکێ ھەلناگریت، کورد د ململانا سێ نەتەوەیێن سەردەست دایە و تێرا خوە تاپۆرێ پێنجێ و جاش و خۆ فرۆش ژی پەیدا کرینە، نە ب تنێ د نوکە دا بەلکو ژ سەردەمێ ساسانیان و تانوکە.
یا ب کوردستانێ دمینیت ڤێ حنێرا ھەرێما کوردستانێ ب ھەمی شیان دناڤ پیلانێن سێ نەتەوەیان دا بەردەوام بکەتن ب ھەمی ئاوایەکێ ئەڤ چرایە بمینت، گوھۆرینێن مەزن پشتی شەڕێن مەزن دروست دبن، شەرڕێ مەزن ئاگرێ وێ ل ئۆکڕینا ھەلبوویە و ئەنجامێن وێ دێ دیاربن وەک دھێتە چاڤەرێکرن، دبیت کوردستانێ ژی ڤێ جارێ بەختەک ھەبیت، ئەو ژی ئەگەر کوردستانێ خوە ل بەر خوە گرت.
