جڤاتا بێسه‌روشوینكرنێن زووره‌ملى یا سه‌ر ب نه‌ته‌وه‌یێن ئێكگرتیڤه داخواز ژ عیراقێ كر، قوربانییێن بێسه‌روشوینان قه‌ره‌بوو بكه‌ن و بزاڤێن سزادانا تاوانباران بكه‌ت.
نه‌ته‌وه‌یێن ئێكگرتى دبێژیت: هه‌تا نوكه ل عیراقێ بێسه‌روشوینكرنا زووره‌ملى ب تاوان ناهێته هژمارتن.
جڤاتا بێسه‌روشینكرنا زووره‌ملى ل عیراقێ داخواز كرییه، بنه‌مایه‌ك بۆ رێگریكرن و بدووماهى ئینان و چاره‌سه‌ركرنا ئه‌وان تاوانێن درندانه بهێته دانان.
هه‌تا نوكه عیراقێ به‌رسڤا وێ راپۆرتێ نه‌دایه، و ل دووڤ راپۆرتا نه‌ته‌وه‌یێن ئێكگرتى، دناڤبه‌را سالێن 1968 بۆ 2003ێ دا ب تنێ ل ژێر ده‌ستهه‌لاتا سه‌دام حسێنی زێده‌تر ژ 290 هزار كه‌سان كو 100 هزار ژ وان كورد بوون هاتینه جینۆسایدكرن.
بێسه‌روشوینبوون پشتى داگیركرنا عیراقێ ژى یا به‌رده‌وام بوو، دهێته ته‌خمینكرن ژ پشتى سالا 2003ێ وه‌ره 200 هزار عیراقى دیار نه‌مابن كو به‌هرا پترا وان ل زیندانان هاتینه ده‌سته‌سه‌ركرن و ژلایێ ئه‌مریكا و بریتانیاڤه سه‌رپه‌رشتییا وان دهاته‌كرن.
