سەرۆکێ رێکخراوا دووربین بۆ پرسێن سیاسی و ئابووری ئاشکرا کر، ب ئەگەرێ رێکكەفتنا ھەولێر و بەغدا پێشبینی دھێتە کرن ھەرێما کوردستانێ بەرەف گەشەکرنەکا ب ھێز یا ئابووریڤه بچیت و سەقامگیرییا ئابووری دێ پەیدا بیت.
د. نەوزاد محەمەد عەزیز، سەرۆکێ رێکخراوا دووربین بۆ پرسێن سیاسی و ئابووری بۆ ئاژانسا خانی دیار کر” رێکكەفتنا ھەولێر و بەغدا دێ وەرچەرخانەکا ئابووری پەیدا کەت” ھەم بۆ عێراقێ و ھەم ژی بۆ ھەرێما کوردستانێ، چونکی ھەرێما کوردستانێ پێدڤی ب ڤێ چەندێ ھەیە، دەرازینکەک بھێتە دیتن بۆ ھنارتنا نەفتێ، ئهو رێگرییێن بەری نوکە ھەین ژلایێ قانوونی و ئابووری دێ دەرباز بن، ھەرێما کوردستانێ دێ دەرکەڤیت ل ئەوان ڤالاھییێن قانوونی بۆ ھنارتنا نەفتێ، کو بەری نوکە ب نەچاری ھەرێما کوردستانێ دەست ب ھنارتنا نەفتێ کر و سەرۆک وەزیرێن عێراقێ ژی ئەڤ چەندە پشتراستکرییە، کو ژبەر شەرێ داعش و بڕینا پشکا ھەرێما کوردستانێ ژلایێ بەغداڤە ھەرێما کوردستانێ سالا ٢٠١٤ێ دەست ب فرۆتنا نەفتێ کر.
ناڤهاتی گۆت ژی” فرۆتنا نەفتا ھەرێما کوردستانێ ب رێیا کۆمپانییا سۆمۆ دێ کاریگەرییێن خوە ھەبن ل سەر کەرتێ نەفت و غازێ، ژبەرکو دێ جێگرێ رێڤەبەرێ وێ کۆمپانییێ کورد بیت و ھژمارەکا بانکی دێ ھێتە ڤەکرن بۆ داھاتێ نەفتا ھەرێما کوردستانێ، بەری نوکە مە سەقامگیرییا سیاسی ل کوردستانێ ههبوو” ھەبوونا سەقامگیرییا ئابوری ژی دێ ئابوورێ ھەرێما کوردستانێ بەرەف گەشەکرنێ ڤهبەت.
