راهێنهرێ یانهیا ریال مهدرید یا ئسپانی كارلۆ ئهنچیلۆتى ل دۆر دیدارا چێلسى د چامپیۆنزلیگێدا دووپاتكر، دڤێت ئهو ب باشترین ئاستێ خوه یارییێ بكهن، 180 خولهك ل پێشییا وانه و یارییا سووبههى یا ئێكلاكهر نابیت.
د پرێسكۆنفرانسێ بهرى یارییێدا راهێنهرێ ئیتالى ئاشكراكر، یارییا ب ساناهى نابیت، راسته رهوشا چێلسى یا خرابه، لێ ئهو یا ب مهترسییه، یارییا ئێكێ یا ئێكلاكهر نابیت، ئهو ب هیڤینه شهڤهكا دییا ئهڤسانهیى ل یاریگهها خوه ببوورینن، یارییا ئێكێ ل یاریگهها وانه و دڤێت مفاى ژێ ببینن داكو ئهركێ وان دیارییا دووێدا ب ساناهى بكهڤیت، ئهو ل یاریگهها خوه و ژ دهرڤه یاریگهها خوه ژى ئاستهكێ باش پێشكێش دكهن.
زێدهتر راهێنهرێ یانهیا شاهانه دیاركر، دڤێت ئهو وهسا هزر دڤێ یارییێدا بكهن، كو دێ 180 خۆلهك بن و دڤێت بزاڤێ بكهن ب ئاستهكێ باش یارییێ بكهن، و دێ گهلهك یا باش بیت ئهگهر هێرشبهرییا وان بۆ ڤێ یارییێ وهكو یا یارییا بهرامبهر بارسێلۆنا بیت.
