وه‌زاره‌تا باژێرڤانى و گه‌شتوگوزارێ: ب بهایێ حه‌فت ملیار دیناران داشكاندن د كرێیا ئاڤێدا بۆ وه‌لاتییان هاتییه‌ كرن

حكومه‌تا هه‌رێما كوردستانێ ب رێكا وه‌زاره‌تا باژێرڤانى و گه‌شتوگوزارێ وه‌كو پشته‌ڤانییه‌ك بۆ وه‌لاتییان داكو بشێن قه‌رێن خوه‌ بده‌ن، ل دوو سالێن بوورى و ب تنێ ل حه‌فت هه‌یڤێن كاركرنێ ب بریارێن لێخۆشبوونێ، ب بهایێ نێزیكى حه‌فت ملیار دیناران داشكاندن بۆ كرێیا ئاڤێ كرییه‌، ئه‌و لێخۆشبوونه‌ ب تنێ یا قه‌رێن ئاڤێ یه‌، و ل ده‌مێ گرێدانا پیڤه‌رێ ئاڤێ ژى لێخۆشبوون بۆ وه‌لاتییان هاتییه‌ كرن.

وه‌زاره‌تا باژێرڤانى و گه‌شتوگوزارێ ل سه‌ر ره‌زامه‌ندییا حكومه‌تا هه‌رێما كوردستانێ، هه‌یڤه‌كا دى بۆكاركرنێ ب بریارا لێخۆشبوونێ ب رێژه‌یا 15%ێ یا كرێیا ئاڤێ راگه‌هاند، كو دبیته‌ جارا پێنجێ دماوێ دوو سالێن بووریدا بریارا لێخۆشبوونێ بۆ هه‌ڤپشكێن ئاڤێ دهێته‌ درێژكرن، و دێ هه‌تا 10ى گۆلانا بهێت كار پێ هێته‌كرن، وه‌لاتى بۆ مفا وه‌رگرتنێ ژ ڤێ بریارێ پێدڤییه‌ سه‌ره‌دانا بنگه‌هێن كۆمكرنا ئاڤێ و فه‌رمانگه‌هـ و رێڤه‌به‌رییان بكه‌ن.