ل شەڤا بوری ل تاخەکێ ھەولێرێ پارێزەره‌ک ژلایێ ھژمارەکا کەسێن دیار دھێتە دەستەسەر کرن و ب شێوەکێ دژوار دھێتە ئەشکەنجەدان و پشتی ئەشكەنجەدانێ گەفێن کوشتنێ ل پارێزەری دھێنە کرن و سەندیکا پارێزەران ژی ئاشکرا کر: سوبەهی خرڤەبوونەک دێ ل دژی ئەڤێ تاوانێ ھێتە ئەنجامدان.
ئەیاد کاکەیی، سەرۆکێ لقێ ھەولێرێ یێ سەندیکا پارێزەران بۆ ئاژانسا خانی دیار کر” بریارە سوبەهی ئێکشەمبی ل سەرانسەری ھەرێما کوردستانێ پارێزەر ل ھەمبەر دەرگەھێ دادگەھێن ھەرێمێ خرڤەبوونەکێ ئەنجام بدەن و ل دژی ھێرشا ل شەڤا بوری بۆ سەر پارێزەرەکێ شیرەتکار ھاتییە کرن و تێدا ب دژواری ھاتییە ئەشەکەنجەدان، وەک ھەلویستەک سوبەهی ھەموو پارێزەر دێ خرڤەبوونەکێ ئەنجام دەن.
ناڤهاتی گۆت ژی” ھێرشکرن بۆسەر ھەر تاکەکی تاوانە نەخاسمە پارێزەر ب خوە بەرەڤانییێ ژ قانوونێ دکەت و دەزگەھێن ئەمنی و پارێزگارێ ھەولێرێ سۆزدایە دێ ئەنجامدەرێن تاوانێ ھێتە دەستەسەر کرن و لدوو قانوونێ دێ ھێنە سزادان ئەگەر پلە و پۆستەک ھەبیت و سەر ب ھەر لایەنەکی ڤەبن، ئەم ژی دێ چاڤەرێی دەزگەھێن پەیوەندیدار بین بۆ پێرابوونێن قانوونی.
