سوودانی دگەل پەرلەمانێ عیراقێ کۆمبوو

سەرۆک وەزیرێن عیراقێ ب ئامادەبوونا هەردوو جێگرێن خۆ و سەرۆکێ جڤاتا نوونەرێن عیراقێ و لژنەیا دارایی یا جڤاتا نوونەران و وەزیرێن دەرڤە یێن نەفت و پلاندانان سەرۆکایەتییا کۆمبوونەکا بەرفرەهــ بۆ گۆتوبێژکرنا پرۆژە یاسایا بودجەیا عیراقێ کر.

 دکۆمبوونێدا گۆتوبێژ دەربارەی ماددەیێن پرۆژە یاسایا بودجەیا گشتی هاتنە کرن کو د نوکەدا ژ لایێ جڤاتا نوونەرێن عیراقێ ڤە گۆتوبێژ ل سەر دهێنە کرن ب مەرەما پەسەندکرنێ، ل گۆرەی نڤیسینگەها ڕاگەهاندنا سەرۆک وەزیرێن عیراقێ د کۆمبوونێدا دوپاتی ل گرنگییا دارشتنا بودجەیێ هاتیە کرن، کو بۆ جارا ئێکێ پڕۆژەیێن وێ دێ بۆ دەمێ سێ سالان بخوڤە گرن، ئەڤێ چەندێ ژی دێ ڕەنگڤەدان ل سەر ئاسانکاری و لەزاتی د بجهئینانا پڕۆژەیێن ژێرخان و خزمەتگوزاریدا هەبیت.

د کۆمبوونێدا، ئەندامێن لژنەیا دارایی یا جڤاتا نوونەرێن عیراقێ چەند تێبینی دەربارەی ماددەیێن پرۆژە یاسایێ بەرچاڤکرن کو ل گۆرەی ڕاگەهاندنێ ژ لایێ سەرۆک وەزیرێن عیراقێ ڤە هاتنە قەبیلکرن ب مەرەما زێدەتر زەنگینکرنا پرۆژە یاسایێ.

ژ لایێ خۆ ڤە، محەمەد شیاع سوودانی، ئاماژە ب پلانا کابینەیا خۆ کر بۆ گەشەپێدان و ئابووری و چاکسازییێن دارایی کو دێ د هاریکاربن بۆ دابینکرنا دەلیڤەیێن کاری یێن راستەقینە و چالاککرنا کەرتێ تایبەت، دگەل هندێ ژی، سوودانی دوپاتکر کو حکومەتا وی دڤێت عیراقێ ئازاد بکەت ل پشتبەستنا داهاتێ نەفتێ بتنێ و ژێدەرێن داهاتی ب ڕێیا چالاککرنا کەرتێ کشتۆکالی و پیشەسازی هەمەجۆر بکەت.