لیزا کاکەیی: بزاڤێن سەرۆکێ حوکمەتێ بۆ چارەسەرکرنا ئاریشێن دارایی د بەردەوامن

ئاژانسا خانی ” تایبەت:

ئەندامەکا لژنا دارایی ل پەرلەمانێ کوردستانێ ئاشکرا کر، بزاڤێن مەسرور بارزانی بۆ دووماھی ئینان ب ئاریشێن دارایی ل گەل عێراقێ د بەردەوامن و ڤەگەڕاندنا پاشکەفتێ مووچەیی ژی نەھاتییە ژبیر کرن، بەلێ دناڤا بوودجەیی دا نەھاتییە جێھگیرکرن.

لیزا کاکەیی، ئەنداما لژنا دارایی ل په‌رلەمانێ کوردستانێ بۆ ئاژانسا خانی دیارکر” چارەسەرکرنا بابەتێ پاشکەفتێ مووچه‌یێ فەرمانبەرێن ھەرێمێ گرێدایی ب رێکكەفتنا بەروەخت یا سیاسی و حکومی ھەیە دناڤبەرا ھەولێر و بەغدا بەری ھنارتنا پڕۆژە قانوونا بوودجەیی بۆ پەرلەمانی دڤێت ئەو پرس دناڤا قانوونا بوودجەیی دا بھێتە ئێکلا کرن، ھەر بزاڤەک بۆ زێدەکرنا بڕگێن تایبەت ب ڤەگەڕاندنا پاشکەفتێ مووچەیی ژلایێ پەرلەمانێ عێراقێ چو ئەنجام نابن، چونکی پەرلەمانی دەستھەلات نینە و ب تنێ حوکمەتێ شیان ھەیە.

ناڤهاتییێ گۆت ژی” ئەڤە رامانا وێ چەندێ نادەت بابەتێ پاشکەفتێ مووچه‌یێ فەرمانبەران پشتگوھ ھاتییە ھاڤێتن، بەرۆڤا ژی بزاڤێن مەسرور بارزانی سەرۆکێ حوکمەتا ھەرێما کوردستانێ بۆ زامنکرنا مافێن دارایی یێن وەلاتی یێن ھەرێما کوردستانێ سەرکەفتی بووینە و بێگومان دێ ئەو بزاڤ د بەردەوامبن بۆ چارەسەرکرنا ھەموو ئاریشیێن دارایی دناڤبەرا ھەرێمێ و بەغدا دا.