پێنج هزار جهێن شوونواری ل هەرێما کوردستانێ هەنە

ئاژانسا خانی:

هەرێما کوردستانێ ب خۆ ده‌ڤه‌ره‌كا شوونوارییە، وه‌لاتێن بیانی گه‌له‌ك گرنگییێ پێ  ددەن و دهێنه‌ هەرێمی کوردستان ڤه‌کۆلینان ل سەر دکەن و نوكه‌ جهێن شوونواری ل هەرێما کوردستانێ گەهشتینە پێنج هزار جهان.

محەمەد لەشکری، بەرپرسێ رێڤەبەرییا کاروبارێن شوونواری و کەلەپۆری ل رێڤەبەرییا گشتی یا شوونوار و کەلەپۆری ل هەرێما کوردستانێ، بۆ ئاژانسا خانی گۆت: د رووپیڤانا سالا ١٩٧٠ ێ دا، کو دەزگەهێ شوونوارێن عێراقی ئەنجام دایە، ٨٥٨ جهێن شوونواری هاتینه‌ تۆمار كرن، پشتی سالا ٢٠١١ ێ و ل سه‌رده‌مێ حكومه‌تا هه‌رێما كوردستانی سێ زانکۆیێن بیانی کارێ رووپیڤانێن شوونواری ل دهۆكێ کرینە ئەو ژی زانکۆیێن (ئۆدینی یا ئیتالی، زانکۆیا تۆبنی یا ئەلمانی، زانکۆیا پۆزنانی یا پۆلەندی) ، نوکە ١٨٠٠ جهێن شوونواری ل دهۆکێ هەنە” كو ئه‌و ژی لدووڤ رووپیڤانا خانی یێن کەلەپۆرییه‌.

ناڤهاتی ئەو ژی ئاشکرا کر: ل هەرێما کوردستانێ پێنج هزار جهێن شوونواری هەنە و لدووڤ رووپیڤانا خانی یێن کەلەپۆری، پشتی سالا ٢٠١١ ێ، ١٥ تیمێن بیانی کارێ رووپیڤانێ ل هەرێما کوردستانێ كرینه‌، وان تیمان پشکەکا کارێ خۆ تەمام کرییە و پشکەک ژی ل سه‌ر كارێ خۆ د بەردەوامن، هەتا نوکە ب تنێ ٤٠٪ ێ یا ئاخا کوردستانێ هاتییە رووپیڤان کرن و ٦٠٪ ێ، هێشتا مایە.

هه‌روه‌سا کەڤنترین جهێ شوونواری شکەفتا شانەدەرە کو بۆ به‌ری ٧٥٠٠٠ سالان ڤەدگەریت، کو جهه‌كێ سەرەکی یێ مرۆڤێن نیاندرتال بوویە.