ڕۆهنکرنەک ژ وەزارەتا دارایی و ئابووری

وەزارەتا دارایی و ئابووری یا حکومەتا هەرێما کوردستانێ د ڕاگەهاندنەکێ دا ئامژە کریە، ل چەند پەیج و دەزگەهێن ڕاگەهاندنێ نووچەیەکێ دوور ژ ڕاستیێ دەربارەی ب سستیا دابەشکرنا مووچێ چەند وەزارەتان ل سلێمانییێ بەلاڤکریە کو ئەگەر بۆ هندێ زڤڕاندینە کو وەزارەتا دارایی پارەیێ پێدڤی بۆ مووچەی نە هنارتیە، وەزارەتا دارایی گوتیە:” مە ب پێدڤی زانی ئەم ڤێ ڕۆهنکرنێ بۆ ڕایا گشتی بەرچاڤ بکەین.”

خاڵێن ڕۆهنکرنا وەزارەتا دارایی و ئابووری:

وەکی هەیڤا بووری پارەیێ پێدڤی بۆ مووچەخۆرێن سلێمانییێ ژ لایێ وەزارەتا دارایی ڤە ب چەند سلفەیان هاتیە هنارتة کو سەرجەمێ گشتی 289 ملیار و 500 ملیۆن دینار بووینە کو دبیتە زێدەتر ژ 80 % یا سەرجەمێ مووچەیێ مووچەخۆرێن ئەوی سنووری.

کۆیێ گشتییێ پارەیێ پێدڤی بۆ مووچەی ل سنوورێ سلێمانییێ 362 ملیارو 300 ملیۆن دینارە و پێدڤییە ئەو کورتهێنانا مای ژ داهاتێ ناڤخۆ بهێتە پڕ کرن وەکی پارێزگەهێن هەولێر و دهۆکێ.

وەک پێشتر ژی مە بەلاڤکری ڕێککەڤتن ل سەر پشکا ( 57 %) یا پشکا ژ ( 43% ) وەزارەتا دارایی ژێ بەرپرسیار نینە و گەلەک یا هەڤدژە، کو پێشتر بۆ دابەشکردنا داهاتێ نەوتێ ڕێککەفتن ل سەر هاتیە کرن.

کێشەیا کورتهێنان و کێمبوونا نەختینێ ل بانکێن سلێمانیێ یا نوو نینە و ل ساڵا 2021ێ دەستپێکریە، کورتهێنان ژی ل بانکێن سلێمانییێ گەهشتیە ئێک ترلیۆن دینار.

بەڕێز وەزیرێ دارایی هەموو بزاڤ و شیانێن خۆ بۆ چارەسەرکرنا ئاریشەیێن دارایی یێن سلێمانییێ و هەرێمێ کوردستانێ ئێخستینە کار و ب بزاڤا جەنابێ وان هەیڤا پێشتر کۆژمێ 34 ملیار دیناران زێدەتر ژ پشکا سلێمانییێ ژ وەزارەتا دارایی بۆ بانکێن سلێمانییێ هاتیە ڕەوانەکریە، ل هەیڤا دوماهیێ یا سالا بووری ژی جارەکا دی کۆژمێ 29 ملیار دیناران ژ دەرڤەی پشکا سلێمانییێ بۆ بانکێن سلێمانییێ هاتیە هنارتن.

وەزارەتا دارایی و ئابووری ئاماژە کریە، ل دوماهییێ ژی پێدڤییە بهێتە گۆتن کو ئاریشەیا سلێمانییێ هندەک ئاریشەیێن بابەتی و خۆیینە کو پێدڤییە بۆ چەند خاڵەکان بهێنە کورتکرن.

• کێمبوونا داهاتێ ناڤخۆ یێ پارێزگەهێ.

• ڕێککەفتنا دابەشکرنا داهاتی ب ڕێژەیا ( 43 %) بە ( 57  %).

• نەمانا پارەیێ کاش (سیولە ل بانکان).