ئەڤرۆ بیره‌وه‌رییا کارەساتا دلتەزینا باژێرێ قەلادزێیە، کو ل سپێده‌هییا ڕۆژا (٢٤ ی نیسانا ١٩٧٤) ێ” فڕۆکێن شه‌ركه‌رێن ڕژێما بەعس ب بۆمبێن ناپالما یێن قەدەغەکری هێرش كره سه‌ر وی باژێری و زانکۆیا سلێمانییێ، د ئەنجامدا ب دەهان قوربانی لێکەفتن ژ قوتابیان و وه‌لاتی یێن سڤیل و ژمارەكا برینداران.
ئەو هێرشا وەحشیگەری ژ ئەنجامێ سیاسەتا رژێما وی سه‌رده‌می و تۆلڤه‌كرن بوو ژ دەڤەره‌كا وەکو پشدەر، ژبەركو ئەو دەڤەرە كوربه‌ند و لاندكا خۆراگرییێ و خەباتا شۆره‌شێن کوردستانێ بوویە، ب تایبەتی ل سەردەمێ شۆره‌شا مەزنا ئیلۆنێ، کو كه‌لهـ و سەنگەرێ بەرگرییێ و خه‌باتێ بوو، هه‌روه‌سا قەڵادزێ پەناگەهێ ڤه‌مان و خۆڕاگرییا گه‌نجێن گەلێ مه‌بوو، له‌وما ژبەر وی پێگەهێ گرنگێ قەلادزێ، ل وی ده‌می ب فەرمانا (بارزانییێ نەمر) زانکۆیا سلێمانییێ هاته ڤه‌گۆهاستن بۆ باژێرێ قەلادزێ.
ئەو کارەساتە هەر وەکو ڕوودان و کارەساتێن دیتر یێن گەلێ مه هندا ئازاربەخش و دلتەزین بوو، کو ژ لایێ (بارزانییێ نەمر) ب رۆژا (ماتەمینا گەلێ کوردستانێ) هاته بناڤكرن.
هەر ل وێ بیره‌وه‌رییێ و ل (٢٤ ی٤ ی ١٩٨٢) ێ، خۆنیشاندانه‌كا وێره‌كانه یا جەماوەرییا بەرفره‌هـ ل وی باژێری هاته سازکرن و ژ لایێ دەزگه‌هێن حكومه‌تا بەعسڤه” درندانە بهر‌سنگێ وان گرت و د ئەنجامدا ژمارەكا وه‌لاتی یێن سڤیل شەهید و برینداربوون.
ل ڤێ بیره‌وه‌رییێ دا سەرێ رێز و نەوازشێ بۆ شەهیدێن قەلادزێ و هه‌موو شەهیدێن کوردستانێ، سەروەرێ وان بارزانییێ نەمر و کاک ئیدریسی هەرده‌م ل بیر دچه‌مینین.
سلاڤ بۆ گیانێ پاقژێ شەهیدێن (٢٤ ی ٤ ی ١٩٧٤)ێ و سه‌رهه‌لدانا (٢٤ ی٤ ی١٩٨٢) ێ یا باژێرێ قەلادزێ.
سلاڤ بۆ پێشمەرگێن قارەمان و هه‌موو ته‌خ و چینێن گەلێ کوردستانێ.
