سەرۆکاتییا باژێرڤانییا زاخۆ: جاددا ئەکادمییا لەشکەری دێ ب کۆژمێ 741 ملیۆن دیناران هێتە سەخبێرکرن

سەرۆکاتیا باژێرڤانییا زاخۆ ڕاگەهاندیە، وەکو دیار بابەتێ جاددا ئەکادمییا لەشکەری دچەندین پەیجاندا هاتیە خوارێ کو ژ کار کەڤتیە.

سەرۆکاتیا باژێرڤانییا زاخۆ دیارکریە، “مە ئاگەهـ ژ ڤێ جاددێ هەیە کو بدرێژاهیا(1300)م دێ هێتە سەخبێرکرن وکوژمێ  (741،000،000) ملیۆن دیناران بۆ  کۆمپانیەکا تایبەتمەند دڤی بواریدا هاتینە ڕەوانەکرن  ودێ ژلایێ وانڤە هێتە بجهئینان لێ بشتی جاددا (خەبات – پیشەسازی) بدوماهیک بهێت ئێکسەر دێ دەست ب سەخبێرکرنا جاددا ناڤبری هێتە کرن.

ئاماژە کریە ژی، هەروەسا جاددا تاخێ جەگەرخوین  ژ ترافیکا سێمالکا تا دگەهیتە ترافیکا پەیمانگەها زاخۆ و جاددا دادگەهێ(سایدێ دووێ) دێ هێتە سەخبێرکرن لدووڤ بەرنامێ باژێڕڤانییا زاخۆ و ب پشتەڤانییا ئیدارا سەربەخۆ وتایبەت جەنابێ سەرپەرشتێ ئیدارێ کاک (گوهدار)ی وهەمی جاددێن ژ کارکەڤتی دێ هێنە سەخبێرکرن ب کۆالتیەکا باش ولدووڤ سەخلەتێن ئەندازیاری.

گوتیە ژی:”داخازێ ژخەلکێ زاخۆ یێ خۆشتڤی دکەین کو ئەگەر گیربوونەک هەبیت بۆ چێکرنا جاددەکێ ئەوژی بۆ وێ چەندێ دزڤریت کو مە نە ڤێت ڕێکێن هاتن و چوونا وەلاتییان زێدەتر بەرتەنگ ببن چونکی هەماهەنگی دگەل ڕێڤەبەرییا هاتن و چوونا زاخۆ ژی دهێتە کرن و گەلەک جاددە د پلانێ دانە و لدووڤ خشتێ هاتیە دیارکرن ژلایێ سەرۆکاتییا باژێرڤانییا زاخۆ ڤە دێ هەمی هێنە سەخبێرکرن  وسیمایەکێ شارستانی  دێ ل زاخۆ دیاربیت، هەر وەکی جەنابێ سەرپەرشتێ ئیدارا زاخۆ چەندین جاران گۆتی: ( دێ زاخۆ بەرەڤ قۆناغەکا دی بەین ).