مەزنترین قارەمانییا تەپا پێی یا هەرێمان دێ ل هەرێما کوردستانێ هێتە کرن

ل ناڤەڕاستا سالا 2024 قارەمانییا تەپا پێی بۆ هەرێمان ( کۆنیفا ) دێ ل کوردستانێ هێتە کرن، 16 هەلبژارتییێن هەرێمان ل سەر ئاستێ جیهانێ دێ بەرهەنگاری ئێک بن.

 تارق عەبدولرەحمان، سەرۆکێ ئێکەتییا تەپا پیی یا کوردستانێ د دیدارەکێدا دگەل فەرمانگەها میدیا و زانیاری ئاماژە کر:” گشت یاری دێ ل یاریگەهێن پارێزگەهێن (هەولێر، دهۆک و سلێمانییێ هێنە کرن و دێ بزاڤان کەین پشکەکا یارییان ژی ببەینە یاریگەهێن ئیدارەیێن زاخۆ و سۆران.”

دیارکر ژی، بۆ جارا دووێ یە قارەمانیەکا ب ئەڤی شێوەی ل کوردستانێ دهێتە کرن و بۆ جارا ئێکێ یە ژی ئەڤ قارەمانییە ل بن ناڤێ (کۆنیفا) دێ هێتە کرن، حکومەتا هەرێما کوردستانێ ژی دێ هەمی ئاسانکارییان بۆ ئەنجامدانا قارەمانییێ کەت.

گۆتژی:” پێشتر هەلبژارتییێ کوردستانێ، دوو جاران پشکداری د قارەمانییا کۆنیفا دا کریە و جارەکێ بوویە قارەمان.”

 دهێتە زانین، کۆنیفا قارەمانییەکا جیهانییە بۆ وان هەرێمێن د وەڵاتێن فیدڕال دا خودان هەرێمێن سەربەخۆنە و 38 هەرێم ل سەر ئاستێ جیهانێ تێدا ئەندامن.