وه‌زاره‌تا ئه‌وقافێ په‌یامه‌كا نه‌رازیبوونێ راگه‌هاند

وه‌زاره‌تا ئه‌وقاف و كاروبارێن ئایینى راگه‌هاند، تیمه‌كا رێكخراوه‌كا خێرخوازى سه‌ره‌دانا مه‌زارگه‌هه‌كێ پیرۆز یێ خووشك و برایێن ئێزدى ل پارێزگه‌ها دهۆكێ كرییه‌ و دوعا كرینه‌ كو ناڤه‌رۆكا وان دوعایان به‌رۆڤاژى پره‌نسیپێن پێكڤه‌ژیانێ و برینداركرنا هه‌ستێ خووشك و برایێن ئێزدینه‌.

دراگه‌هاندنا وه‌زاره‌تا ئه‌وقافێدا هاتییه‌، رێكخراوه‌ك ل ژێر ناڤێ كارێ خێرخوازى و مرۆڤایه‌تییێ ب ناڤێ ( Light The Candle )  دناڤا كه‌مپێن ئاواره‌یاندا كار دكه‌ت، تیمه‌كا رێكخراوێ سه‌ره‌دانا مه‌زارگه‌هه‌كێ پیرۆز یێن خووشك و برایێن ئێزدى ل پارێزگه‌ها دهۆكێ كرییه‌، د گرته‌ ڤیدیویه‌كێدا دیاردبیت كو دوعایان دكه‌ن، لێ ناڤه‌رۆكا وان به‌رۆڤاژى پره‌نسیپێن پێكڤه‌ژیانێ و برینداركرنا هه‌ستێن خووشك و برایێن ئێزیدینه‌.

وه‌زاره‌تا ئه‌وقاف و كاروبارێن ئایینى ئاشكرا ژى كر، ئه‌و وه‌كو وه‌زاره‌تا ئه‌وقاف و كاروبارێن ئایینى و رێڤه‌به‌رییا گشتییا مه‌سیحییان و رێڤه‌به‌رییا گشتییا ئێزیدییان ب تووندى ئیدانه‌یا كارێ ڤێ رێكخراوێ دكه‌ن، كو ب ناڤێ خێرخوازییێ كارێن خوه‌ دكه‌ن، وه‌زاره‌ت داخوازێ ژ لایه‌نێن په‌یوه‌ندیدار دكه‌ت رێكارێن قانوونى به‌رامبه‌ر ئه‌ڤان جوره‌ كاران بكاربینن، ژبه‌ركو ئه‌نجامێ وان كاران دێ كارتێكرن ل سه‌ر ئارامى و ئاشتییا جڤاكى هه‌بیت.