وه‌زیرێ په‌روه‌ردێ : هێزێن ئێمناهییێ بانده‌ك ده‌سته‌سه‌ركر كو كار ل سه‌ر خاپاندنا قوتابییان دكر

ئالان حه‌مه‌ سالح سه‌عید وه‌زیرێ په‌روه‌ردێ یێ حكومه‌تا هه‌رێما كوردستانێ ئاشكراكر، هێزێن ئێمناهییێ ل سه‌ر داخوازا قانوونییا وه‌زاره‌تا په‌روه‌ردێ بانده‌ك ده‌سته‌سه‌ركر كو كار ل سه‌ر خاپاندنا قوتابییان دكر.

ئالان حه‌مه‌ سه‌عیدى د پرێسكۆنفرانسه‌كیدا راگه‌هاند، سزایێن تووند ل دووڤ قانوونێ بۆ دزینا پرسیارێن تاقیكرنێن پۆلێن دووماهییێ هاتینه‌ دانان، داكو دادپه‌روه‌رییێ ب سه‌لمینن دێ رێكاران به‌رامبه‌ر باندێن خاپاندنێ بكارئینن.

وه‌زیرێ په‌روه‌ردێ داخواز ژ قوتابییان كر نێزیكى وان جۆره‌ باندان نه‌بن و خوه‌ ب وان بابه‌تانڤه‌ مژوول نه‌كه‌ن، هه‌تا به‌رێ سپێدى ژى پرسیارێن تاقیكرنان ناگه‌هنه‌ پارێزگه‌هان.

ئالان حه‌مه‌ سه‌عیدى سه‌باره‌ت پرۆسه‌یا نه‌هێلانا قوپیایێ دیاركر، پرۆسه‌ ل ناڤا پرۆگرامێن خواندنێ ب چه‌ند قووناغان هاتییه‌ رێكخستن داكو ببیته‌ كولتووره‌ك و ره‌وشه‌نبیرییه‌ك بۆ قوتابییان.

وه‌زیرێ په‌روه‌ردێ راگه‌هاند ژى، مۆبایلێن تایبه‌ت بۆ هه‌موو وان مامۆستایان هاتینه‌ دابینكرن یێن پشكدارییێ دتاقیكرنێن پۆلا 12ێدا دكه‌ن، نابیت ئامیرێن ئه‌لكترۆنى ببه‌نه‌ دژوورڤه‌، هه‌روه‌سا دڤێت پشكنین بۆ قوتابییان بهێنه‌كرن.

ئاماژه‌ ب هندێ ژى دا، نابیت پشتى تاقیكرنان ژى وێنه‌ بۆ پرسیاران بهێنه‌ گرتن، ژبه‌ركو وه‌زاره‌تا په‌روه‌ردێ پشتى تاقیكرنان دێ كۆپییه‌كا پرسیاران به‌لاڤكه‌ت.