سه‌رۆكوه‌زیران مه‌سرور بارزانى پێشوازى ل جێگرێ سه‌رۆكوه‌زیران و وه‌زیرێ پلاندانانا حكومه‌تا عیراقێ كر

سه‌رۆكێ حكومه‌تا هه‌رێما كوردستانێ و وه‌زیرێ پلاندانانا حكومه‌تا عیراقێ دووپاتى ل گرنگییا بجهئینانا هه‌موو وان رێككه‌ڤتنان كر یێن د كارنامه‌یا حكومه‌تا فیدرالدا ئاماژه‌ پێ هاتییه‌ دان.

مه‌سرور بارزانى سه‌رۆكێ حكومه‌تا هه‌رێما كوردستانێ پێشوازى ل محه‌مه‌د عه‌لى ته‌میم جێگرێ سه‌رۆكوه‌زیران و وه‌زیرێ پلاندانانا عیراقێ كر.

ل دووڤ راگه‌هاندنا حكومه‌تا هه‌رێما كوردستانێ، دكۆمبوونێدا دانوستاندن ل دۆر ره‌وشا گشتییا عیراقێ و گرنگییا په‌سه‌ندكرنا قانوونا بودجه‌یا فیدرال ل جڤاتا نوونه‌ران ب زووترین ده‌م هاته‌ كرن، ب هیڤییا هندێ ببیته‌ ده‌ستپێكه‌ك بۆ چاره‌سه‌ركرنا ئاریشه‌یێن دناڤبه‌را هه‌رێما كوردستانێ و حكومه‌تا فیدرالدا ل سه‌ر بنه‌مایێن ده‌ستوورى و دابینكرنا ماف و شایسته‌یێن ده‌ستوورییێن خه‌لكێ كوردستانێ.

ئاماژه‌ ب هندێ ژى هاته‌ دان، دووپاتى ل گرنگییا بجهئینانا هه‌موو وان رێككه‌ڤتنان هاته‌ كرن یێن د كارنامه‌یا حكومه‌تا فیدرالدا ئاماژه‌ پێ هاتییه‌ دان.