وه‌زیرێ په‌ترۆلا عیراقێ: رێككه‌ڤتنا دناڤبه‌را هه‌ولێر و به‌غدا دا یا تایبه‌ت ب په‌ترۆلێ گه‌هشتییه‌ قووناغێن دووماهییێ

وه‌زیرێ په‌ترۆلا عیراقێ راگه‌هاند، به‌غدا و هه‌ولێر دێ د ده‌مه‌كێ كورتدا هووركارییێن تایبه‌ت ب بجهئینانا رێككه‌ڤتنا هنارده‌كرنا په‌ترۆلا هه‌رێما كوردستانێ بۆ ژ ده‌رڤه‌ تمامكه‌ن، ئاماژه‌ ب هندێ ژى دا، توركیا دنوكه‌دا مژوولى چاككرنا بۆریا به‌نده‌رێ جه‌یهانه‌ كو په‌ترۆلا عیراق و هه‌رێما كوردستانێ تێدا بۆ ژ ده‌رڤه‌ هێته‌ هنارتن.

حه‌یان عه‌بدولغه‌نى وه‌زیرێ په‌ترۆلا  عیراقێ ل په‌راوێزا پشكدارییا خوه‌ د كوربه‌ندێ عیراقێدا بۆ سه‌قامگێرى و ڤه‌ژاندنێ كو كارێن وێ ل به‌غدا ب رێڤه‌دچن، دووپاتكر، رێككه‌ڤتنا دناڤبه‌را به‌غدا و هه‌ولێرێدا سه‌باره‌ت په‌ترۆلێ گه‌هشتییه‌ قووناغێن دووماهییێ و دنوكه‌دا كار ل سه‌ر ئێكلاكرنا هووركارییێن ناڤا رێككه‌ڤتنێ دهێته‌كرن كو دبیت هه‌تا دوو حه‌فتییێن دى تمامبیت.

وه‌زیرێ په‌ترۆلا عیراقێ دیار ژى كر، ئه‌و زانیارییێن ژ توركیا دهێن ئاماژێ ب هندێ د ده‌ن كو بۆرییێن په‌ترۆلا عیراقێ بۆ به‌نده‌رێ جه‌یهان ل ژێر چاككرن و پشكنینێ نه‌، ئه‌ڤ چه‌نده‌ د به‌رژه‌وه‌ندییا عیراقێدایه‌ بۆ هندێ دلۆپه‌كا په‌ترۆلێ ژى ب هه‌روه‌ نه‌چیت.