وه‌زیرێ دارایى : ئه‌وله‌وییه‌تا مه‌ بجهئینانا رێككه‌ڤتنا هه‌ولێر به‌غدا ل سه‌ر بودجه‌ و په‌ترۆلێ یه‌

وه‌زیرێ دارایى و ئابوورى یێ حكومه‌تا هه‌رێما كوردستانێ چه‌ند زانیارى ل سه‌ر رێككه‌ڤتنا دناڤبه‌را هه‌ولێر و به‌غدا دا و ده‌ستپێكرنا پرۆسه‌یا هنارده‌كرنا په‌ترۆلا هه‌رێما كوردستانێ ئاشكراكرن.

ئاوات شێخ جه‌ناب وه‌زیرێ دارایى و ئابوورى دگه‌ل دكتۆر تۆركیل بیۆگ به‌رپرسێ نڤیسینگه‌ها په‌یوه‌ندییێن ئێكه‌تییا ئورۆپا ل هه‌رێما كوردستانێ كۆمبوو.

دكۆمبوونێدا وه‌زیرێ دارایى ده‌مێ هنارده‌كرنا په‌ترۆلێ و پشكا هه‌رێمێ ژ پرۆژه‌ قانوونا بودجه‌یا فیدرالدا بۆ مێڤانان روونكرن و راگه‌هاند، بنه‌مایێن رێككه‌ڤتنێ ڤه‌دگه‌رن بۆ ده‌ستپێكا پێكئینانا حكومه‌تا نوو یا عیراقێ و چه‌ند خاله‌ك بۆ ئیداره‌كرنا كه‌یسا په‌ترۆلا هه‌رێمێ دگه‌ل چارچووڤێ هه‌ماهه‌نگییێ چه‌سپاندینه‌.

راگه‌هاند ژى، دڤێ قووناغێدا ئه‌وله‌وییه‌تا هه‌رێما كوردستانێ بجهئینانا رێككه‌ڤتنا هه‌رێم و به‌غدایه‌ وه‌كو خۆ و دوى چارچووڤه‌یدا هه‌رێما كوردستانێ هه‌موو داخوازى بجهئیناینه‌ و چاڤه‌رێى عیراق و توركیا دكه‌ت بۆ ده‌ستپێكرنا هنارده‌كرنا په‌ترۆلا هه‌رێمێ و چاره‌سه‌ركرنا ئه‌وان ئاریشه‌یێن سیاسى و ته‌كنیكى یێن دپرۆسه‌یێدا ماین.

ئاوات جه‌ناب نوورى گوت ژى : راگرتنا په‌ترۆلێ ئاریشه‌یێن مه‌زن بۆ مووچه‌یێ فه‌رمانبه‌ران دروست كرینه‌ و هیڤیدارن حكومه‌تا عیراقێ سۆزێن خوه‌ بۆ دابینكرنا مووچه‌یێ فه‌رمانبه‌ران بجهبینیت.