وه‌زاره‌تا بازرگانییێ: برنجێ هه‌یڤا بهێت دێ ژ ئه‌رجه‌نتین و ئوروگواى هێت

وه‌زاره‌تا بازرگانییا عیراقێ ئاشكراكر، كه‌شتییه‌كا بارهه‌لگر یا برنجێ كو تایبه‌ته‌ ب پشكا خوارنا هه‌یڤانه‌ یا وه‌لاتییان گه‌هشته‌ به‌نده‌رێ مینا ل به‌سره‌، دووپات ژى كر، جۆرێ برنجى گه‌له‌كێ باشه‌ و ژ وه‌لاتێن ئه‌رجه‌نتین و ئوروگواى هاتییه‌.

له‌میا هاشم مووسه‌وى رێڤه‌به‌را گشتییا كۆمپانییا گشتییا بازرگانییا خوارنێ یا سه‌ر ب وه‌زاره‌تا بازرگانیڤه‌ گوت: كه‌شتییه‌كا تایبه‌ت كو برنج هه‌لگرتییه‌ بۆ پشكا خوارنا هه‌یڤانه‌ یا وه‌لاتییان نوكه‌ گه‌هشتییه‌ به‌نده‌رێ مینا و 33 هزار ته‌نێن برنجى هه‌لگرتینه‌.

گوت ژى : برنج دناڤ كیسێن 50 كیلۆیدایه‌ و جۆرێ وى گه‌له‌كێ باشه‌ و ژ وه‌لاتێن ئه‌رجه‌نتین و ئوروگواى هاتییه‌ هاورده‌كرن.

هه‌روه‌سا دیاركر، پشتى ل تاقیگه‌هان پشكنین بۆ دهێنه‌كرن و پشت راست دبن كو بۆ بكارئینانێ یێ گونجاى یه‌، ئێكسه‌ر دێ ب سه‌ر بریكارێن خوارنێدا هێته‌ به‌لاڤكرن و گه‌هیته‌ ده‌ستێ وه‌لاتییان.