وه‌زیرێ دارایى یێ عیراقێ ئاشكراكر، د پرۆژه قانوونا بودجه‌یا 2023ێدا، ده‌ستكارییا مووچه و پاره‌یێ چاڤدێرییا جڤاكى و پشكا خوارنێ ناهێته‌كرن.
ته‌یف سامى وه‌زیرێ دارایى یێ عیراقێ راگه‌هاند، د پرۆژه قانوونا بودجه‌یا سالا 2023ێدا بابه‌تێ مووچه‌ى هاتییه جهگیركرن و چ گوهۆرین د مووچه‌یێ فه‌رمانبه‌ر و خانه‌نشیناندا ناهێته‌كرن.
دیار ژى كر، ژبلى مووچه‌یێ فه‌رمانبه‌ران، بودجه‌یا چاڤدێرییا جڤاكى و بودجه‌یا پشكا خوارنێ ژى یا جهگیره و ده‌ستكارى تێدا ناهێته‌كرن.
ئاماژه ب هندێ ژى دا، ئه‌و ل سه‌ر دامه‌زراندنا وان فه‌رمانبه‌ران یێن بۆ ماوێ دوو سالان یان زێده‌تر خزمه‌ت كرى دبه‌رده‌وامن، د بودجه‌یا ئه‌ڤ ساله‌دا دێ چاره‌سه‌رییا ئاریشه‌یێن وان فه‌رمانبه‌ران هێته‌كرن، یێن هه‌ڤبه‌ستێن وان هاتینه هه‌لوه‌شاندن.
هه‌روه‌سا دیاركر، بهایێ په‌ترۆلێ دبلندبوونێدایه و پێشبینى دهێته‌كرن بگه‌هیته 81 دۆلاران، له‌وما ئه‌گه‌ر په‌ترۆل بلندبوو، ئه‌و قه‌ران ژ بانكان ناكه‌ن.
دووپات ژى كر، كه‌یسا كاره‌بێ بارگرانییه‌كا مه‌زن ل سه‌ر حكومه‌تێ دروستكرییه، كه‌یسا كاره‌بێ ژ هه‌موو بابه‌تێن دى گرانتر ل سه‌ر گه‌نجینه‌یا گشتى راوه‌ستییایه و 16 تریلیۆن دینارێن پاره‌یێ گشتى دبه‌ت، كو به‌هرا پتر یا وى پاره‌یى بۆ كرێیا غازا ئیرانێ و پاره‌یێ وه‌به‌رهێنه‌رێن ناڤخۆ و چه‌ندین بوارێن دى یێن كاره‌بێ دبه‌ن.
