جڤاتا وه‌زیران پرۆژه‌ قانوونا رێكخستنا داراییا گشتى ل هه‌رێما كوردستانێ په‌سه‌ندكر

جڤاتا وه‌زیرێن هه‌رێما كوردستانێ ب سه‌رپه‌رشتییا سه‌رۆكوه‌زیران مه‌سرور بارزانى و جێگرێ وى قوتاد تاله‌بانى كۆمبوو.

ل ده‌ستپێكا كۆمبوونێ سه‌رۆكوه‌زیران خۆشحالییا خوه‌ ب ڤه‌گه‌ریانا تیما وه‌زارى یا ئێكه‌تی نیشتیمانى كوردستان بۆ كۆمبوونێن جڤاتا وه‌زیران ده‌ربرى.

سه‌رۆكوه‌زیران ب ناڤێ جڤاتا وه‌زیران پشته‌ڤانییا حكومه‌تا هه‌رێما كوردستانێ بۆ ده‌ستپێشخه‌ری و په‌یاما سه‌رۆك مه‌سعوود بارزانى بۆ ئاشتییا نیشتیمانى ده‌ربرى و دووپاتى ل ئێك هه‌لویستى و ئێكگرتنا لایه‌نێن كوردستانێ ژ پێخه‌مه‌ت داكۆكیكرنێ ل به‌رژه‌وه‌ندییێن نیشتیمانى كر.

برگه‌یا ئێكێ یا كۆمبوونێ یا تایبه‌ت بوو ب دووماهى پیشهاتێن ده‌ستپێكرنا هنارده‌كرنا په‌ترۆلا هه‌رێما كوردستانێ ژ چارچووڤێ رێككه‌ڤتنا دناڤبه‌را حكومه‌تا هه‌رێمێ و حكومه‌تا فیدرالدا كو ژلایێ سه‌رۆكوه‌زیرانڤه‌ هاته‌ روونكرن.

سه‌رۆكوه‌زیران ئاماژه‌ ب هندێ دا، حكومه‌تا هه‌رێما كوردستانێ هه‌موو پابه‌ندییێن خوه‌ ژ چارچووڤه‌یێ رێككه‌ڤتنێ بجهئیناینه‌، نوكه‌ چاڤه‌رێى حكومه‌تا فیدرال و حكومه‌تا توركیانه‌ كو ب گه‌هنه‌ رێككه‌ڤتنێ بۆ دووباره‌ ده‌ستپێكرنا هنارده‌كرنا په‌ترۆلا هه‌رێما كوردستانێ، دهه‌مان ده‌مدا پێدڤییه‌ حكومه‌تا فیدرال ژى بودجه‌یه‌كا پێدڤى بۆ مووچه‌خۆرێن هه‌رێما كوردستانێ بۆ حكومه‌تێ ب هنێریت هه‌تا كو پرۆژه‌ قانوونا بودجه‌یا فیدرال دهێته‌ په‌سه‌ندكرن، ماف و شایسته‌یێن دارایى یێن هه‌رێما كوردستانێ دچارچووڤێ بودجه‌یدیا فیدرالدا بهێنه‌ دابینكرن.

دبرگه‌یا دووێدا دانوستاندن ده‌رباره‌ى پرۆژه‌یێ ( رێكخستنا داراییا گشتى ل هه‌رێما كوردستانێ ) هاته‌كرن، پشتى گوتوبێژكرنێ ل سه‌ر ڤى بابه‌تى، جڤاتا وه‌زیران ب به‌هرا پتر یا ده‌نگان بریاردا، رێكخستنا داراییا گشتى ل سه‌رانسه‌رى هه‌رێمێ ب رێكا ( ب ناڤبه‌ینكرنا داهات و سیوله‌ و خه‌رجى و مووچه‌ى ) بیت، بۆ وێ مه‌ره‌مێ ژى بریار هاته‌ دان، هه‌موو ژێده‌رێن داهاتى ژ بانك و گه‌نجینه‌ و ده‌رییێن سنۆرى و رێڤه‌به‌رییێن باج و رسوماتان ب مه‌ره‌ما پاراستنا داهاتێ گشتى بهێنه‌ رێكخستن و ب رێكا سیسته‌مه‌كێ ئه‌لیكترۆنى پێكڤه‌ بهێنه‌ گرێدان.

ته‌وه‌ره‌كێ كۆمبوونێ گرێداى ئاریشه‌یێن ئێمناهییێ بوو، جڤاتا وه‌زیران بریاردا لێكۆلینه‌كا هه‌ڤپشك ب رێكا لژنه‌یه‌كا تایبه‌تمه‌ند ژ ده‌زگه‌هێن په‌یوه‌ندیدار سه‌باره‌ت كه‌یسێن ئێمناهییێ و دوور ژ ده‌ستێوه‌ردانێن سیاسى بهێته‌كرن، دووڤدا رێكارێن قانوونى بهێنه‌ بكارئینان.