پێشنییار دهێته‌ كرن بودجه‌یێ پێشڤه‌برنا پارێزگه‌هان ببیته‌ چار ترلیۆن دینار

ئاژانسا خانی:

لژنا داراییا پەرلەمانێ عێراقێ پێشنیار دكه‌ت ترلیۆنه‌ك و پێنج سەد مليار دينار بۆ بودجەیێ پێشڤه‌برنا پارێزگه‌هان د پڕۆژە قانوونا بودجەیێ گشتییێ عێراقێ دا بهێته‌ زێده‌ كرن و ببیته‌ چار ترلیۆن دینار.

شێروان دوبەردانى، ئەندامێ لژنا هەرێمێ و پارێزگه‌هان ل پەرلەمانێ عێراقێ” بۆ ئاژانسا خانی دیار كر: هاتییه‌ پێشنیار کرن بودجەیێ پێشڤه‌برنا پارێزگه‌هان ژ دو ترلیۆن و پێنج سەد ملیار دیناران بهێته‌ زێده‌ كرن بۆ  چار ترلیۆن دیناران.”

ناڤهاتى گۆت ژى، “زێده‌ كرنا وی كۆژمێ پاران دێ پشکا پارێزگه‌هان د بودجەیی دا زێده‌ كه‌ت، بەلێ پیڤه‌رێ دابەشکرنێ وەکو خۆیه‌ و لدووڤ پڕۆژە قانوونا بودجەێێ گشتییێ عێراقێ، دو ترلیۆن و پێنج سەد ملیار دینار هاتینه‌ تەرخانکرن بۆ پێشڤه‌برنا پارێزگه‌هان کو ل سەر بنەمایێ هژمارا ئاكنجییان و رێژا هەژارییێ ل سەر پارێزگه‌هێن عێراقێ دا هاتییه‌ دابەش كرن.

شێروان دوبه‌ردانی گۆت ژی: پشکا هەرێما کوردستانێ د وی بودجەیی دا 276 ملیار و 550 ملیۆن دینارن و 40 ملیار دینارێن به‌هرا هه‌رێما كوردستانێ دكێمن دێ بزاڤێ كه‌ین وی كۆژمێ پاران ژی بۆ هه‌رێما كوردستانێ زێده‌ بكه‌ین.