دەستەیا وەبەرهێنانێ: ل سالا بهێت كــرێدار دشێن یەكەیێن خۆ یێن ئاكنجیبوونێ وەربگرن

 ئاژانسا خانی:

ب بریاره‌كا مه‌سرور بارزانی سەرۆكێ حکومەتا ھەرێما کوردستانێ، 20 ھزار شوقە ب رێیا وەبەرھێنانێ و ب پشته‌ڤانییا حكومه‌تێ بۆ کرێنشینان و کێم دەرامەتان ل هه‌موو ده‌ڤه‌رێن هه‌رێما كوردستانێ دێ هێنه‌ دروست كرن.

سەرۆکێ دەستەیا وەبەرهێنانێ ل حكومه‌تا هه‌رێما كوردستانێ گۆت: هه‌كه‌ ئه‌ڤ ساله‌ دەست ب دروستکرنا یەکه‌یێن ئاكنجیبونێ یێن تایبەت ب کرێدار و کێم دەرامەتان بهێته‌ كرن، ل ناڤه‌راستا سالا بهێت هه‌تاكو سالا 2025 ێ”، کرێنشین دشێن شوقه‌یێن خۆ وه‌ربگرن.

د. محەمەد شوکری، زێده‌تر بۆ ئاژانسا خانی دیار كر: دروستکرنا یەکەیێن ئاكنجیبوونێ بۆ كێم ده‌رامه‌تان، پرۆسەكا دوور و درێژە و ب شێوێ ئەلكترۆنی ناڤ هاتینه‌ وەرگرتن و هه‌تا نوكه‌ ل هنده‌ك ده‌ڤه‌ران مه‌ ئاریشا ئه‌ردی هەبوویه‌، هه‌روه‌سا نوكه‌ ل ئیدارا سه‌ربه‌خۆیا زاخۆ پێنگاڤێن‌ دەستپێكرنا وان یه‌كه‌یان هاتینه‌ هاڤێتن.

ناڤهاتی گۆت ژی: مه‌ سۆز دایه وه‌لاتییان كو‌ ئه‌و پرۆژە ل هه‌یڤا گولانا ئه‌ڤ ساله‌ دەست پێ بكه‌ت و د ماوێ ساله‌كێ دا تەمام ببیت، هەروەسا ل هەولێرێ ژی ب هەمان ره‌نگ و ل سلێمانییێ ژی ئەگەر ئه‌رد هه‌بیت، ئه‌م د ئامادەینه‌ دەست ب چێكرنا وان بكەین و هه‌روه‌سا وه‌لاتی دشێن مفایی ژ وان یەكەیێن ئاكنجیبوونێ وەربگرن و ببنە خودان شوقه‌، ئەگەر ئه‌ڤ ساله‌ دەست ب وان یه‌كه‌یان بهێته‌ كرن، وه‌لاتی دێ شێن ل ناڤه‌راستا سالا بهێت هه‌تاكو سالا 2025 ێ” وان شوقه‌یان وه‌رگرن.