شانده‌كێ وه‌زاره‌تا پێشمه‌رگه‌ى ل فره‌نسایه‌

ل پاریسێ شانده‌كێ وه‌زاره‌تا پێشمه‌رگه‌ى دیدار و كۆمبوون دگه‌ل به‌رپرسێن له‌شكه‌رى یێن فره‌نسا كرن و دووڤدا د رێوره‌سمه‌كێ له‌شكه‌ریدا و ب ئالایێن كوردستانێ و فره‌نسا تاجه‌گۆلینه‌ ل سه‌ر گۆرێ سه‌ربازێ به‌رزه‌ ( كڤانێ سه‌ركه‌ڤتنێ ) دانا.

مێژوویا دروستبوونا كڤانێ سه‌ركه‌ڤتنێ یان سه‌ربازێ به‌رزه‌ ل پاریسێ بۆ سه‌رده‌مێ ناپلیۆنى ڤه‌دگه‌ریت، كو ئێك ژ سمبۆلێن نیشتیمانییێ فره‌نسایه‌، سالانه‌ به‌هرا پتر یا رێوره‌سم و هه‌لكه‌ڤتێن نیشتیمانى یێن فره‌نسا ل وى جهى ب رێڤه‌دچن وه‌كو رێزگرتنه‌ك بۆ قوربانییێن له‌شكه‌رێ فره‌نسا كو ل ده‌مێن بوورى گیانێن خوه‌ گۆرى وه‌لاتێ خوه‌ كربوون.

شاندێ وه‌زاره‌تا پێشمه‌رگه‌ى ژ عه‌بدولخالق بابیرى بریكارێ وه‌زاره‌تا پێشمه‌رگه‌ى دگه‌ل ژماره‌كا دییا فه‌رمانده‌یێن پێشمه‌رگه‌ى پێكهاتبوو، ئارمانج ژ چوونا وى شاندى ب هێزكرنا په‌یوه‌ندییێن سه‌ربازى یێن دناڤبه‌را كوردستانێ و فره‌نسادا بوو.

نوونه‌رێ حكومه‌تا هه‌رێما كوردستانێ و ده‌زگه‌هێ پێشمه‌رگه‌ى ب هاریكارییا فێدراسیۆنا شه‌ركه‌رێن دێرینێن فره‌نسا ئه‌ڤ سه‌ره‌دانه‌ رێكخستبوو.

فره‌نسا ئێك ژ وان وه‌لاتێن ئورۆپى یه‌ یێن په‌یوه‌ندییه‌كا مێژوویى دگه‌ل هه‌رێما كوردستانێ هه‌ی،  رۆله‌كێ ب هێز دشكاندنا داعشێ و هاریكاریكرنا پێشمه‌رگه‌یدا هه‌بوو.