لژنه‌یا فه‌توا لقێ دهۆك یێ ئێكه‌تییا زانییێن ئایینێ ئیسلامێ كوردستان راگه‌هاندنه‌ك ل دۆر بازارێ پاره‌یێ دێجیتالى ( ئه‌لكترۆنى ) راگه‌هاند، و بازاركرن ب ڤان جۆره پاره‌یان ب نه‌شه‌رعى و نه‌دروست هژمارت.
د. جیهاد دوسكى سه‌رۆكێ لژنه‌یا فه‌توایێ بۆ ئاژانسا خانى دیاركر، پشتى وان دوڤچوونه‌كا درێژ ل سه‌ر ڤى بابه‌تى كرى و دگه‌ل خۆدانێن ڤان سایتان ئاخڤتین و خه‌لكى سه‌ره‌دانا وان ل ئێكه‌تییا زانایان لژنه‌یا فه‌توایێ كرى و سێ كۆمبوون ل سه‌ر كرین و پرسیارا ماموستایێن تایبه‌تمه‌ند دڤى بابه‌تیدا كرى كو هنده‌ك ژ وان بسپۆرێن ئه‌كادیمى یێن شه‌رعی بوون و هنده‌ك ژى تایبه‌تمه‌ندێن بابه‌تێن بازارێن شه‌رعى بوون، بۆ هه‌موویان دیاربوو كو ئه‌ڤ بازاره ژ په‌یاما ئیسلامێ یێ دووره، به‌لكو ب ( بیع الغرر ) یاكو پێغه‌مبه‌رێ ئیسلامێ نه‌هى ژێكرى، دهێته هژمارتن.
سه‌رۆكێ لژنه‌یا فه‌توایێ ئاماژه ب هندێ ژى دا، پشتى لژنه‌یێ گه‌نگه‌شه و پێداچوون ل سه‌ر بابه‌تێ ڤان جۆره پاره‌یێن ئه‌لكترۆنى كرى، ب فه‌ر دیت ڤێ روونكرنێ ب وه‌لاتییان بده‌ت و ڤان خالێن ل خوارێ به‌رچاڤ بكه‌ت :
1 – ژبه‌ركو نه‌زانین ( جه‌هاله‌ت ) یا دكرین و فرۆتنا ڤى بازاریدا هه‌ى، پێغه‌مبه‌رێ خۆدێ ئه‌م یێ ژ ڤى جۆرێ بازارى داینه پاش، وه‌كو د ڤێ فه‌رموودا پیرۆزدا هاتى ( نهى رسول الله عن بیع الغرر ) رواه مسلم.
2 – هه‌روه‌سا ده‌لیڤه‌یا سه‌خته‌كارییێ ( حیله )یێ و ته‌شقه‌لێ یا تێدا هه‌ی.
3 – مه‌رجێن بازارێ شه‌رعى وه‌كو ( ملكییه‌تێ ) و ( وه‌رگرتنێ ) دپاره‌یێ ئه‌لكتیرۆنیدا نائێته وجودێ، و ئه‌ڤه به‌رۆڤاژى بنه‌مایێن شه‌ریعه‌تێ ئیسلامێ و فه‌رمودا پێغه‌مبه‌رێ خۆدێ یه، ژبه‌ركو دفه‌رمودا پیرۆزدا هاتییه ( لا بيع إلا فيما تملك ) رواه أبى داود في سننه ، و حسنه الألباني.
4 – ئه‌ڤ جۆره پاره نه ل ژێر چ ده‌ستهه‌لاته‌كا فه‌رمیدایه.
5 – دیسان ڤى پاره‌ى چ بهایه‌كێ دیار و ده‌ستنیشانكرى نینه.
6 – چ لایه‌نه‌كى یان وه‌لاته‌كى په‌سه‌ندا باوه‌رپێكرنێ یا ڤان جۆره پاره‌یێن ئه‌لكترۆنى نه‌كرییه.
د جیهاد دوسكى به‌حس ل هندێ ژى كر، ئه‌و دێ هنده‌ك لژنه‌یان بۆ هووشیاركرنا خه‌لكى پێكئینن، و دێ كورته ڤیدیویان ل سه‌ر زیانێن ڤى جۆرێ بازاركرنێ دروست كه‌ن، ل رۆژێن ئه‌ینى ژى دێ دگوتاراندا به‌حسى خرابییێن ڤان جۆره بازاران هێته‌كرن، دێ خودانێن وان بازاران ژى ئاگه‌هداركه‌ن كو فه‌توا هاته دان و ئێدى نابیت ئه‌ڤ جۆره بازاره بهێنه‌كرن.
