<h3 style="text-align: justify;"><span style="font-size: 18pt;">پیشه‌كارێ غانى یێ یانه‌یا دهۆك پرێنس ئوپۆكوى ژ به‌ر چه‌ند ئه‌گه‌ران خاترا خوه ژ یانه‌یا دهۆكێ خواست.</span></h3> <h3 style="text-align: justify;"><span style="font-size: 18pt;">هه‌ژار مه‌عروف بریكارێ هێرشبه‌رێ غانى پرێنس ئوپۆكوى بۆ ئاژانسا خانى دیاركر، پیشه‌كارێ یانه‌یا دهۆك پرێنس ئوپۆكوى ئه‌وێ ل هێلا هێرشبه‌رییێ یارى دكر، ژبه‌ر چه‌ند ئه‌گه‌ر و ئاریشه‌یێن خێزانى هه‌ڤبه‌ستا خوه دگه‌ل یانه‌یێ هه‌لوه‌شاند.</span></h3> <h3 style="text-align: justify;"><span style="font-size: 18pt;">ئاماژه ب هندێ دا، به‌رى سێ حه‌فتییان ئاریشه‌یه‌كا خێزانى بۆ یاریكه‌رێ ناڤبرى په‌یدا ببوو، وان داخواز ژ كارگێرییێ كر هه‌ڤبه‌ستا وى ب هه‌لوه‌شینن و ده‌رفه‌تێ بده‌نێ به‌ره‌ڤ وه‌لاتێ خوه‌ڤه بچیت ژبه‌ركو یێ نه‌چاربوو ڤێ پێنگاڤێ پاڤێت، لێ ل ده‌ستپێكێ داخوازا وى هاته ره‌تكرن، ژبه‌ركو راهێنه‌رێ تیمێ سلێمان ره‌مه‌زان ژ شیانێن وى یێ رازیبوو و نه‌دڤییا ده‌ستان ژێ به‌رده‌ت، لێ پشتى دانوستاندنێن به‌رده‌وام، یانه‌یێ كاودانێن وى یێن خێزانى به‌رچاڤ وه‌رگرتن و رازیبوو هه‌ڤبه‌ستا وى ب هه‌لوه‌شینیت و رێكێ بده‌تێ بچیت، سه‌رۆكێ یانه‌یێ د. عه‌بدلا و راهێنه‌رێ تیمێ سوپاسییا وى كر ل سه‌ر وێ خزمه‌تا پێشكێشى یانه‌یێ كرى و مووچه‌یێ وى یێ ڤێ هه‌یڤێ ژى پێشكێشكر.</span></h3> <h3 style="text-align: justify;"><span style="font-size: 18pt;">هه‌روه‌سا سكرتێرێ یانه‌یێ جاسم حاجى بۆ ئاژانسا خانى دووپاتكر، ئوپۆكوى ژبه‌ر ئاریشه‌یێن خێزانى یانه هێلا، ئه‌و یاریكه‌ره‌كێ پیشه‌كاره و هه‌ر ده‌مێ وى ڤییا ڤه‌گه‌ریت، دهۆك مالا وییه و ده‌رگه‌هێن یانه‌یێ دێ بۆ دڤه‌كرى بن.</span></h3> <h3 style="text-align: justify;"><span style="font-size: 18pt;">دهێته زانین، ئوپۆكوى ل ده‌ستپێكا ڤى وه‌رزى په‌یوه‌ندى ب یانه‌یا دهۆكێ كربوو، پشكدارى د 25 یارییاندا كر و شیا 11 گۆلان ب درێسێ وێ تۆماربكه‌ت، 9 ژ وان د خۆلا نایابا عیراقێدا بوون، ئێك دكۆپا عیراقێدا بوو و یا دی ژى د قووناغا پله‌ی ئوفدا تۆماركربوو.</span></h3>
