ئۆڤه‌رپاسا شێخان دێ ل سەر بودجەیێ بانکا نێڤدەولەتی هێته‌ چێكرن

ئاژانسا خانی:

رێڤەبەرا رێك و پران ل پاریزگه‌ها دهۆکێ دیار كر: ئه‌م یێ بزاڤان دكه‌ین ل سەر بودجەیا بانکا نێڤدەولەتی، ئۆڤەرپاسا شێخان ل سەر رێیا سەرەکییا هەولێر بۆ دهۆکێ بهێته‌ دروست كرن و ، دیزاینێ وێ ئۆڤه‌رپاسێ ژی هاتییه‌ دروست كرن و یێ به‌رهه‌ڤه‌ و ب ڤێ چه‌ندێ ترۆمبێل هه‌ر ژ زاخۆ هه‌تا دگه‌هیته‌ هه‌ولێرێ ل چ جهات راناوه‌ستن و هه‌ر ده‌مێ ئه‌و قه‌ره‌ بهیته‌ په‌سه‌ند كرن” ئه‌و پرۆژه‌ دێ ده‌ستپێكه‌ت و به‌ری نوكه‌ مه‌ رێیا گرشینی بۆ سحێلا ل سه‌ر قه‌رێ بانكا نێڤده‌وله‌تی چێكرییه‌.

خەدیجە محەمەد، زێده‌تر بۆ ئاژانسا خانی دبێژیت: بڕیارە ئۆڤەرپاسا شێخان بهێته‌ دروست كرن” كو ل سەر بودجەیێ بانکا نێڤدەولەتی” كو ئه‌و قه‌ره‌كێ بده‌ته‌ عێراقێ و پشكه‌كێ ژ وی قه‌ری بده‌ته‌ هەرێما کوردستانێ و مه‌ ژی وه‌كو رێڤه‌به‌ریا رێك و پران ل دهۆكێ ئه‌و پلانە دانایه‌ كو بودجەیی بۆ وی پرۆژه‌یی دابین بکەین و ئه‌و ئۆڤەرپاسە بهێته‌ دروست كرن و تێچوویێ وی پرۆژه‌یی ژی 18 ملیار دینارێن عیراقینه‌ و ئه‌و پرۆژه‌ دێ بۆ ده‌مێ سال و نیڤان هێته‌ ته‌مامكرن.

ناڤهاتییێ گۆت ژی: “دیزاینا وێ ئۆڤەرپاسێ یا ئامادەیە و ب تنێ ئه‌و مایە كو پارە بۆ بهێته‌ دابین كرن و نوكه‌ ئه‌م چاڤه‌رێی وه‌رگرتنا قه‌رێ بانكا نێڤده‌وله‌تی دكه‌ین‌ و ئه‌ڤ چه‌نده‌ یا گرێدایه‌ ب په‌سه‌ندكرنا پرۆژه‌ قانوونا بودجه‌یێ عیراقێ ڤه‌” هه‌ر ده‌مێ بودجه‌ بۆ وێ ئۆڤه‌رپاسێ هات مه‌زاختن” ئه‌م دێ دەست ب دروستکرنا وی كه‌ین، چونکی ئه‌و تاكه‌ جهه‌ نوكه‌ ترافیک لایت لێ هه‌یی ل سەر رێیا هەولێر بۆ دهۆکێ و ب دروستبوونا وێ ئۆڤەرپاسێ ئه‌و ترافیك لایته‌ ژی نامینیت.