مەکتەبا سیاسیییا پارتی پیرۆزباهییا 48 سالییا دامەزراندنا ئێکەتییێ دکەت و ڕادگەهینیت، دوپاتییێ ل هەماهەنگی و دوستایەتییا هەمی هێزێن سیاسی یێن کوردستانێ بۆ بەرهەنگاربوونا ئاڵنگارییێن مە یێن نوکە و ئەنجامدانا هەلبژارتنێن پەرلەمانێ کوردستانێ دکەین.
ئەڤرۆ پێنچ شەمبی 1 خزیرانا 2023، مەکتەبا سیاسی یا پارتی دیموکراتی کوردستان د پەیامەکێدا پیرۆزباهی ل ئێکەتییێ کر و دبێژیت:”ئەڤێ هەلکەڤتێ وەکو دەرفەتەکێ دبینین بۆ دوپاتکرنێ ل داکوکیکرن ل مافێن وەلاتییان و پاراستنا قەوارەیێ هەرێما کوردستانێ و دەستکەفتێن مە و بهێزئێخستنا گیانێ ئێکگوتاری و ئێک هەلویستییا سیاسی ژ پێخەمەت بەرژەوەندییا وەلاتییێن کوردستانێ.”
ئێکەتییا نیشتیمانییا کوردستانێ پارتەکا سیاسییە ل باشوورێ کوردستانێ و جهێ وێ یێ سەرەکی دکەڤیتە باژێڕێ سلێمانییێ، ئەندامە د ڕێکخراوا سۆسیالیست ئینتەرناسیۆنال یا جیهانیدا و ل ئێکی خزیرانا سالا 1975 هاتیە دامەزراندن، بانگەشا ئێکەتییێ وەسایە، کار بۆ مافێ چارەنڤیسێ خۆ، مافێ مرۆڤی و دیموکراسی دکەت، سەرەڕای ئاشتی و ئارامییێ بۆ کوردان د عیراقێدا.
د پشکەکا دی یا پەیاما پارتی دا باس ل چارەسەرکرنا ئاریشەیان و ئەنجامدانا هەلبژارتنێن کوردستانێ کریە و دبێژیت:” دوپاتییێ ل ئەنجامدانا هەلبژارتنێن خولا شەشێ یێن پەرلەمانێ کوردستانێ و بهێزترکرنا پایەیێن دیمۆکراسیێ دکەین.”
