د ئه‌ڤ ساله‌دا زێده‌تر 700 هزار گه‌شتیاران هاتینه‌ دهۆكێ

په‌یڤدارێ رێڤه‌به‌رییا گشتییا گه‌شتوگوزارا دهۆكێ دیاركر، ل دووڤ وان ئامارێن ژ سازییێن په‌یوه‌ندیدار گه‌هشتینه‌ وان، ژ ده‌ستپێكا ئه‌ڤ ساله‌ و هه‌تا نوكه‌ زێده‌تر ژ 700 هزار گه‌شتیاران سه‌ره‌دانا دهۆكێ كرییه‌.

رێوار محه‌مه‌د ره‌شید په‌یڤدارێ رێڤه‌به‌رییا گشتییا گه‌شتوگوزارا دهۆكێ بۆ ئاژانسا خانى راگه‌هاند، ل سالا بوورى نێزیكى دوو ملیۆن و 500 هزار گه‌شتیاران سه‌ره‌دانا پارێزگه‌ها دهۆكێ كربوو، ژ ده‌ستپێكا ئه‌ڤ ساله‌ و هه‌تا نوكه‌ زێده‌تر ژ 700 هزار گه‌شتیاران سه‌ره‌دانا پارێزگه‌هێ كرییه‌، گوت ژى: د ئه‌ڤ ساله‌دا زێده‌تر ژ 10 بنگه‌هێن نوو یێن گه‌شتیارى ل پارێزگه‌ها دهۆكێ هاتینه‌ ڤه‌كرن، ل پارێزگه‌ها دهۆكێ نێزیكى 900 بنگه‌هێن گه‌شتیارى یێن موله‌ت پێداى و 250 هاڤینگه‌هـ وه‌كو جهێن سرۆشتى هه‌نه‌ كو زێده‌تر ژ 12 هزار كارمه‌ندان ل ڤان بنگه‌هان كار دكه‌ن.

هه‌روه‌سا رێوار محه‌مه‌د ره‌شیدى دیاركر، چەندین پرۆژێن نوی یێن گەشتیاری نوکە د قووناغا بجهئینانێدانە و هندەك پرۆژە ژی دهێنە نووژەنکرن ژوان ژى نووژەنکرنا هۆتێلا بەری ل ناحییا سەرسنیکێ، كو نوکە 80% کارتێدا هاتییە بجهئینان و ل سەر شێوازێ وێ یێ بەرێ دێ هێتە نووژەنکرن، هەروەسا ل دەمەکێ نێزیك دێ دەست ب نووژەنکرنا هۆتێلا سکەی ل قەزا ئامێدییێ هێتەکرن کو ل سالا بووری ئەو خێزانێن د ناڤ ڤێ هۆتێلێدا ژ لایێ حکومەتا هەرێمێ ڤە هاتبوونە قەرەبووکرن، هەرەوەسا پرۆژێ تلفریکا چیایێ گارەی ژی د قووناغا دووماهییێ یا ب رێڤەبرنا رێکاران دایە و ل دەمەکێ نێزیك دێ هێتە بجهئینان، ل سالا بووری ژی مەزنترین کومەلگەها گەشتیاری ب کۆژمێ زیده‌تر ژ دوو ملیار دیناران ل ناحییا دێرەلۆکێ یا سەر ب قەزا ئامێدییێ ڤە ژ ایێ وەبەرهێنەرەکێ خەلکێ وێ دەڤەرێ ڤە هاتبوو چێکرن، ب تمام بوونا.

په‌یڤدارێ رێڤه‌به‌رییا گشتییا گه‌شتوگوزارا دهۆكێ ئاماژه‌ ب هندێ دا، بجهئینانا ڤان پرۆژان ب سەدان دەلیڤێن کاری دێ بۆ گەنجێن ڤێ دەڤەرێ پەیدابن و دێ بیتە ئەگەرەك کو پترین رێژا گەشتیاران ژی سەرەدانا پارێزگەها دهۆکێ بکەن.