خالد ڕێکانی: بزاڤ دهێنە کرن بودجەیا عیراقێ بێی کوردان بهێتە پەسەندکرن

لایەنێن سیاسی یێن عیراقێ هەمی بزاڤان دکەن بەری بێهنڤەدانا یاسایی پڕۆژەیێ بودجەیا گشتی یا عیراقێ ل جڤاتا نوونەران بهێتە دەرباکرن

خالد ڕێکانی، ئەندامێ جڤاتا نوونەرێن عیراقێ بۆ ئاژانسا خانی ڕاگەهاند، هندەک لایەنێن سیاسی یێن عیراقێ بزاڤان دکەن بێی کوردان بودجە ل جڤاتا نوونەرێن عیراقێ بهێتە پەسەندکرن و بۆ ئەڤێ مەرەمێ ژی پڕانیا پەرلەمانتارێن شیعەیان دەست بۆ کۆمکرنا ئیمزایان کریە و تا نوکە زێدەتری 70 ئیمزایان کۆمکرینە.

وی ئەندامێ جڤاتا نوونەرێن عیراقێ ئاماژە کر، بەری دەمەکێ کێم فوئاد حسێن، جێگرێ سەرۆکوەزیرێن عیراقێ ل دوور ئالۆزییێن پڕۆژە یاسایا بودجێ دگەل لایەنێن سیاسی یێن عیراقێ کۆمبوویە.

دیارکر ژی، دهێتە پێشبینی کرن سوبەهی لژنا دارایی یا عیراقێ ل سەر پرسێن گرێدای پرۆژە یاسایا بودجەیا گشتی فیدڕال کۆمببیت و ئەگەر لایەنێن سیاسی عیراقێ ل سەر خالێن 13-14 یێن گرێدای پشکا هەرێما کوردستانێ گەهشتنە ڕێککەفتنا دوماهی ل پێنچ شەمبیێ دێ دەنگ ل سەر بودجەیا گشتی هێتە دان.

گۆتژی:”ب بهانەیا نێزیکبوونا بێهنڤەدانا یاسایی و دەربازکرنا پڕۆژە یاسایا بودجێ ل بەری بهێنڤەدانێ، لایەنێن سیاسی یێن عیراقێ بزاڤەکا جددی دکەن کو بێی کوردان پڕۆژە یاسایا بودجێ دەرباز بکەن و تا نوکە لاینێن عیراقی زێدەتری 70 ئیمزایان بۆ دەربازکرنا پڕۆژە یاسایا بودجێ کۆمکرینە.