شاخه‌وان عه‌بدوللا: ئەم دێ بەردەوام بەرگرییێ ژ خەلکێ دەڤەرێن کوردستانی کەین

ئاژانسا خانی ” تایبەت:

  جێگرێ سەرۆکێ پەرلەمانێ عێراقێ ئاشکرا کر، ھەموو بزاڤ دھێتە کرن بۆ چارەسەرکرنا ئاریشا جۆتیارێن کەرکووکێ و بەری نوکە ژی بەردەوام مە بزاڤێن چارەسەرکرنێ کرینە و دڤێت قانوونەک بۆ ھەلوەشاندنا بڕیارێن سەردەمێ رژێما بەعس بھێتە دەکرن.

د. شاخەوان عەبدوللا، جێگرێ سەرۆکێ پەرلەمانێ عێراقێ بۆ ئاژانسا خانی دیارکر” ئەو جۆتیارێن ھاتینە دەستەسەر کرن ژلایێ سوپایێ عێراقێ ڤە ھاتینە ئازادکرن و بڕیارە چارشەمبییا بهێت ھەرسێ پێكھاتێن کەرکووکێ لدۆر ئاریشا جۆتیارێن کەرکووکێ  کۆم ببن و پڕۆژەک بھێتە بەرھەڤکرن بۆ چارەسەرکرنا ئاریشا جۆتیارێن کەرکووکێ و ئاریشێن ئەردی ل وان دەڤەران، ژبەرکو ئاریشێن زۆر ھەنە و ئەم ژی دێ بەرگرییێ ژ وەلاتیێن خوە کەین ل دەڤەرێن کوردستانی.

ناڤهاتی گۆت ژی” پێدڤییە ئاریشا جۆتیاران بھێتە چارەسەرکرن و رێگری ل جۆتیارێن کورد نەھێتە کرن بۆ چاندنا ئەردێ خوە، ھەر ژ دەستپێکا دەستبکاربوونا مە ئەم بەردەوام بووینە ل بزاڤێن خوە بۆ چارەسەرکرنا ئاریشان،  بەرۆڤاژی دڤێت پڕۆژە قانوونەک بھێتە بەرھەڤکرن ژبۆ ھەلوەشاندنا بڕیارێن سەردەمێ رژێما بەعس و ئەرد بۆ خەلکێ رەسەن ڤەگەڕیت.