لایەنێن سیاسی یێن عیراقێ دێ ل دژی هەرێما کوردستانێ دەنگ ب ڕەشنڤیسێ بودجەیا گشتی دەن

دەستەیا سەرۆکایەتیا جڤاتا نوونەرێن عیراقێ د کۆمبوونێ دایە و پشتی دەمەکێ کێم دێ بڕیارێ ل سەر برێڤەچوونا کۆمبوونا پەرلەمانێ عیراقێ ل دوور دەنگدان ل سەر پڕۆژە یاسا بودجەیا گشتی یا عیراقێ دەت.

ژێدەرەکێ تایبەت ژ جڤاتا نوونەرێن عیراقێ بۆ ئاژانسا خانی ڕاگەهاند، بڕیارە ل دەمژمێر 11:00 ئەڤ شەڤە کۆمبوونا جڤاتا نوونەرێن عیراقێ بهێتە کرن و دەنگ ل سەر پرۆژە یاسایا بودجەیا گشتی یا عیراقێ بهێتە دان.

وی ژێدەری دەربارەی ماددێن 13-14 ژ پشکا هەرێما کوردستانێ گۆت:”تا نوکە ڕێککەفتن ل سەر ماددێ 13 هاتیە کرن لێ هندەک خالێن ماددێ 14 ماینە و بەروڤاژی ڕێککەفتنا دناڤبەرا حکومەتێن هەولێر و بەغدا هاتینە دەستکاریکرن.”

ئاماژەکر ژی، وەکو لایەنێن کوردی ل بەغدا دێ پشکداریێ د کۆمبوونێ دا کەن لێ دەنگ ب هەمی برگە و ماددێن پڕۆژە یاسایا بودجێ نادەن، چونکی بەروڤاژی ڕێککەفتنا دناڤبەرا حکومەتێن هەرێمێ و بەغدا دانە و ل دژی مافێن دەستووری یێن خەلکێ هەرێما کوردستانێ نە.