ل سەر ئاستێ قەزایان ژی دێ ده‌ڤه‌رێن پیشەسازی هێنه‌ دروست کرن

ئاژانسا خانی، زنار تۆڤی:

رێڤەبەرێ گشتییێ موهله‌تدانێ ل دەستەیا گشتییا وەبەرھێنانێ ل ھەرێما کوردستانێ ئاشكرا كر: ئێدی ل سەر ئاستێ قەزایان ژی دێ ده‌ڤه‌رێن پیشەسازی هێنه‌ دروست کرن و مه‌ره‌ما مه‌ ژ ڤی پرۆژه‌یی ئه‌وه‌” نه‌كو ب تنێ ل پارێزگه‌هان كارگه‌هـ هه‌بن و دڤێت كارگه‌هـ ل قه‌زایان ژی هه‌بن” داكو ده‌لیڤێن كاری پتر بۆ خه‌لكێ مه‌ په‌یدا ببن” ئه‌م پشته‌ڤانییا وه‌به‌رهێنه‌ران كه‌ین” كو كارگه‌هان ل قه‌زایان دروست بكه‌ن” هه‌روه‌سا ل هه‌ر قه‌زایه‌كێ هه‌كه‌ ئه‌رد بهێته‌ دابینكرن كارگه‌هـ دێ هێنه‌ دانان و هه‌موو خزمه‌تگۆزاری ژی دێ بۆ هێنه‌ دابینكرن” وه‌كو كارگه‌هێن داگرتنا فێقی و چه‌ندین جۆرێن دیتر یێن كارگه‌هان” هه‌روه‌سا حکومەتا ھەرێما کوردستانێ گه‌له‌ك گرنگییێ ب کەرتێ پیشەسازی دده‌ت” له‌وما ل سەر ئاستێ قەزایان ژی دێ ده‌ڤه‌رێن پیشەسازی هێنه‌ دروست کرن.

د. ھەڤال سه‌دیق، زێده‌تر بۆ ئاژانسا خانی دیار كر: هه‌ر كارگه‌هه‌كا بهێته‌ دانان و ئه‌م بزانین یا باشه‌ ل هه‌ر قه‌زایه‌كێ بیت” ئه‌م وه‌كو ده‌سته‌یا وه‌به‌رهێنانێ دێ په‌سه‌ندێ ده‌ینێ و دێ ئه‌و كارگه‌هـ هێته‌ دانان و دیسان ئه‌م دێ ڤه‌دیتنێ بۆ كه‌ین” كانێ ئه‌و كارگه‌هه‌ دێ شێت چه‌ند كه‌سان ده‌ته‌ كاری” دێ چ مفایی گه‌هینیته‌ خه‌لكێ وێ ده‌ڤه‌رێ” دیسان نوكه‌ وه‌به‌رهێنه‌رێن بیانی دهێن و وان دڤێت وه‌به‌رهێنانێ ل كوردستانی بكه‌ن” مه‌ دڤێت وان وه‌به‌رهێنه‌ران ل سه‌ر پارێزگه‌هان و قه‌زایان دابه‌ش كه‌ین” ئه‌ڤ چه‌نده‌ دێ بیته‌ ئه‌گه‌رێ هندێ كو ده‌لیڤێن كاری بۆ خه‌لكێ مه‌ په‌یدا بكه‌ت و ب ڤێ رێكێ ئه‌م دێ شێین به‌رهه‌می خۆمالی هنێرینه‌ ده‌رڤه‌یی وه‌لاتی و به‌رهه‌مێ بیانی ژی كێمتر دێ هێته‌ كوردستانێ” دێ بزاڤه‌كا باش یا ئابووری ل كوردستانێ په‌یدا بیت.

ناڤهاتی گۆت ژی: مه‌ره‌ما مه‌ ژ دروستکرنا وان ده‌ڤه‌رێن پیشه‌سازی ل قه‌زایان ئه‌وه‌” چه‌ندین ده‌لیڤێن كاری دێ بۆ خه‌لكێ مه‌ ل قه‌زایان په‌یدا بن و به‌رهه‌مێ ناڤخۆیی ژی دێ زێده‌ بیت، چونکی ل وان ده‌ڤه‌ران دێ چه‌ندین كارگه‌هێن جۆدا د هه‌موو واران دا هێنه‌ دروست كرن” د هه‌مان ده‌مدا د ڤێ كابینا حكومه‌تا هه‌رێمێ دا گه‌له‌ك گرنگی ب کەرتێ پیشەسازی هاتییه‌ دان و حكومه‌تا هه‌رێمێ ژی موهلەت دایه‌ 290 پڕۆژێن پیشەسازی.