نێچیرڤان بارزانی: دابەشبوونا ئالییێن هەرێمێ زیانێ دگەهینتە كوردستانێ

نێچیرڤان بارزانی، سەرۆكێ هەرێما كوردستانێ ئەڤرۆ پەیامەك لدۆر پەسەندكرنا بودجەیێ عیراقێ بەلاڤكر.

دەقێ پەیاما سەرۆکێ هه‌رێما كوردستانێ؛

پێشوازى ل پەسەندكرنا بودجەیێ سێ سالێن عیراقێ دكەین. هیڤیدارین ببیتە نەخشەڕێیەكا باش بۆ پێشكەڤتنا ئابووری و سەقامگیرییا سیاسی و ژیانەكا باش یا وەبەرهێنانێ دروست بكەت. دەستخۆشییێ ل هەمی ئەوان كەسان دكەین یێن كو ب دلسۆزانە بۆ بەرژەوەندییا وەلاتییان و یەكسانییا وەلاتییێن عیراقێ كار كری.

ب لێبورینڤه‌ د دانوستاندنێن پەرلەمانیدا، هندەك ژ پەرلەمانتاران ب شێوەیەكێ نەدروست ڕەفتار بەرامبەر مافێن هەرێما كوردستانێ و دەڤەرێن ناكۆكی لسەر كرن. ئەڤا ڕوودای دگەل بنەمایێن ڕێككەڤتنا سیاسییا هاڤپەیمانێن ب ڕێڤەبرنا دەولەتێ ناگونجیت و ئەو ئاراستە و شێوەیە د كاركرنا خزمەتا پڕۆسا سیاسی و ڕەوش و داهاتییا عیراقێ ناكەت.

پێدڤییە یاسایا بودجەی ب شێوەیەكێ دادپەروەرانە بهێتە بجهئینانان و بەرچاڤكرنا پێگەهێ هەرێما كوردستانێ وەك قەوارەكێ سیاسی یێ دەستووری و دەڤەرێن ئاریشە لسەر بكەت، ماف و بەرژەوەندییان ب پارێزیت. دڤێت پشتراستییەكا تەمام هەبیت ژ شایستەیا دارایی و مووچەیێ فەرمانبەرێن هەرێما كوردستانێ ب ئەگەرەكێ سیاسی نەهێنە پاشئێخستن و خەمساری تێدا نەهێتەكرن.

ئەڤا مە د دەمێ دانوستاندنا بودجەیی دا دیتی، جهێ دلگرانییەكا كویرە و جارەكا دی ئەو ڕاستی سەلماند كو دابەشبوونا ئالییێن كوردستانێ زیانێ ب هەرێما كوردستانێ دگەهینیت، ئەڤ چەندە ب ئیرادەیا سیاسییا هەڤبەش و ب بەرچاڤكرنا بەرژەوەندییا گشتی، دشێن ئەڤێ بكەینە دەرفەتەك بۆ بهێزكرنا باوەریێ دناڤبەرا مەدا، ڕێكخستنا باشتركرنا ناڤ مالا خۆ، كێمبوونا ئالۆزییان و چارەسەركرنا ئاریشەیان بۆ بهێزكرنا زێدەتر یا عیراق و هەرێما كوردستانێ.

نێچیرڤان بارزانی
سەرۆکێ هەرێما کوردستانێ

2023-06-13.