ئافره‌تێن هه‌ولێرێ بوونه‌ قاره‌مانێن كوپا عیراقێ یا فۆتسالێ

بۆ جارا ئێكێ د دیرۆكا خوه‌دا یانه‌یا ئافره‌تێن هه‌ولێرێ ب ناسناڤێ كوپا عیراقێ یا فۆتسالێ هاته‌ خه‌لاتكرن، پشتى دیارییا دووماهییێدا ریمۆنتادا ئینای و پاشكه‌ڤتنا خوه‌ ب دوو گۆلان به‌رامبه‌ر جه‌وییه‌ كرییه‌ سه‌ركه‌ڤتن ب چار گۆلان به‌رامبه‌ر دوو گۆلان.

یارییێن كوپا عیراقێ یا فۆتسالا كچان بۆ ماوێ حه‌فتییه‌كێ ل دهۆكێ ب پشكدارییا 10 یانه‌یان هاتنه‌كرن، یانه‌یێن پشكدار ل سه‌ر دوو كۆمان هاتنه‌ به‌لاڤكرن، ئافره‌تێن هه‌ولێرێ وه‌كو یانه‌یا ئێكانه‌ یا باشوورێ كوردستانێ پشكدارى كر و شیا ناسناڤى بده‌ستڤه‌ببه‌ت.

ل ده‌ستپێكێ جه‌وییه‌ ب دوو گۆلان پێشكه‌ڤت، لێ ئافره‌تێن هه‌ولێرێ ده‌ستبه‌ردارى ئه‌نجامى نه‌بوون و ب سه‌ركێشییا شوخان نووره‌دینێ، شیان ریمۆنتادایێ تۆماربكه‌ن، پاشكه‌ڤتنا خوه‌ بكه‌نه‌ سه‌ركه‌ڤتن ب چار گۆلان به‌رامبه‌ر دوو گۆلان.

ئه‌ڤه‌ دبیته‌ ناسناڤێ دووێ ل ڤى وه‌رزى یانه‌یا ئافره‌تێن هه‌ولێرێ بده‌ستڤه‌دبه‌ت، كو به‌رى حه‌فتییه‌كێ بناسناڤێ خۆلا فۆتسالا كوردستانێ ژى هاتبوو خه‌لاتكرن.