بایدن جه‌ژنێ ل موسلمانێن جیهانێ پیرۆز دكه‌ت

سه‌رۆكێ ئه‌مریكا نامه‌یه‌كا پیرۆزباهییێ ب هه‌لكه‌ڤتا هاتنا جه‌ژنا قوربانى ئاراسته‌یى موسلمانێن جیهانێ كر.

دراگه‌هاندنه‌كا كوچكا سپیدا هاتییه‌، جۆ بایدن سه‌رۆكێ ئه‌مریكا جه‌ژنا قوربانى ل موسلمانێن جیهانێ پیرۆزكر و گوت : ئه‌و و هه‌ڤژینا خوه‌ جیلى، جوانترین پیرۆزباهییان ئاراسته‌یى هه‌موو وان كه‌سان دكه‌ن یێن جه‌ژنا قوربانى، جه‌ژنا مه‌زن و پیرۆزا موسلمانان دگێرن.

بایدن دبێژیت : نه‌ریتێن ڤێ جه‌ژنێ بیرهاتنێن چیرۆكا ئیبراهیم و دلسوزییا خێزانا وى بۆ خۆداینه‌، ئه‌ڤ جه‌ژنه‌ بیرئینانه‌ ب گرنگییا قوربانیدانێ، خێركرن و هاریكاریكرنا بێبه‌ختێن ڤێ جیهانێ.

سه‌رۆكێ ئه‌مریكا گوت ژى : ئه‌ڤ ساله‌ بۆ جارا ئێكێ ل كوچكا سپى، ب ئاماده‌بوون و كۆمبوونا سه‌ركرده‌یێن كۆمه‌لگه‌ها موسلمانان ب سه‌رپه‌رشتییا كامالا هاریس جێگرا سه‌رۆكى و هه‌ڤژینێ وێ دۆگلاس ئێمهۆفى ئاهه‌نگا جه‌ژنا قوربانى هاته‌ گێران، ئه‌و ل ئه‌مریكا شانازییێ ب خۆگرتنا ملیۆنان موسلمانان دبه‌ن كو پێكهاته‌یێ وان یێ جڤاكى ده‌وله‌مه‌ند دكه‌ن، ملیۆنان موسلمان ل سه‌رانسه‌رى جیهانێ ژ وانا ئه‌مریكا ژى جه‌ژنا قوربانى دگێرن، هیڤییا وان ئه‌وه‌ جه‌ژنا قوربانى، خۆشى، ئاشتى و ئێكگرتییا دلان و مالان ب خۆڤه‌بگریت، چاڤێ وان یێ ل وان ئه‌مریكییان یێن ناسناڤێ حه‌جى وه‌رگرتى ڤه‌گه‌رنه‌ وه‌لاتێ خوه‌. جه‌ژنا هه‌وه‌ پیرۆز بیت.