شانده‌كێ حكومه‌تا هه‌رێما كوردستانێ كو ژ ئانۆ جه‌وهه‌ر وه‌زیرێ ڤه‌گۆهاستن و گه‌هاندنا هه‌رێما كوردستانێ و د. عه‌لى ته‌ته‌ر پارێزگارێ دهۆكێ پێكهاتییه بۆ به‌حسكرنا كێشانا هێلا شه‌مه‌نده‌فرێ ل ده‌ڤه‌رێن عیراقێ هه‌تا دگه‌هیته هه‌رێما كوردستانێ و وه‌لاتێ توركیا ل به‌غدایه.
ئانۆ جه‌وهه‌ر وه‌زیرێ ڤه‌گۆهاستن و گه‌هاندنا هه‌رێما كوردستانێ ل دۆر وێ چه‌ندێ دبێژیت : ئه‌ڤرۆ ئه‌و ل به‌غدانه بۆ هندێ چه‌ند دانوستاندنان ل سه‌ر ئه‌وى پرۆژه‌یێ عیراقێ بكه‌ن كو پرۆژه‌یێ كێشانا هێلا شه‌مه‌نده‌رێیه ل ده‌ڤه‌رێن عیراقێ بۆ هه‌رێما كوردستانێ و وه‌لاتێ توركیا.
گوت ژى : بریاره شه‌مه‌نده‌فره‌كا بله‌ز دوى پرۆژه‌یدا بهێته دانان كو له‌زاتییا وێ 200 كیلۆمه‌تر د ئێك ده‌مژمێردایه و ژ فاو بۆ هه‌رێما كوردستانێ و توركیا و وه‌لاتێن دى ژى دچیت.
ئانۆ جه‌وهه‌رى گوت ژى : ئه‌و ل سه‌ر راسپارده‌یا ئامۆژگارییا مه‌سرور بارزانى سه‌رۆكێ حكومه‌تا هه‌رێما كوردستانێ هاتینه به‌غدا و سه‌رۆكێ حكومه‌تێ دووپاتى ل هندێ كرییه كو ئه‌و پرۆژه كا چه‌وا دێ دبه‌رژه‌وه‌ندییا خه‌لكێ عیراقێدا بیت، دڤێت وه‌سا د به‌رژه‌وه‌ندییا خه‌لكێ كوردستانێ ژى دا بیت.
ئاماژه ب هندێ ژى دا، پرۆژه ژلایێ كۆمپانییه‌كا ئیتالیڤه دێ هێته بجهئینان.
هه‌ر ل دۆر وێ چه‌ندێ د. عه‌لى ته‌ته‌ر پارێزگارێ دهۆكێ دیاركر، ئه‌و هێلا شه‌مه‌نده‌فرێ دێ ژ قه‌زا سێمێلى به‌ره‌ڤ زاخۆ و ئیبراهیم خه‌لیل ڤه چیت و ئاسانكارییان پێشكێشى خه‌لكى كه‌ت، لی وان چه‌ند تێبینییه‌ك ل سه‌ر هه‌نه و دانوستاندن ژى د به‌رده‌وامن بۆ هندێ خه‌لكێ هه‌رێما كوردستانێ وه‌كو خه‌لكێ عیراقێ مفاى ژ وى پرۆژه‌ى وه‌ربگرن.
