سوودانى : لژنه‌یه‌ك دێ سه‌رپه‌رشتییا دانوستاندنێن وه‌زاره‌تا نه‌فتێ و وه‌زاره‌تا سامانێن سروشتى كه‌ت

سه‌رۆكوه‌زیرێن عیراقی محه‌مه‌د شیاع سوودانى ب ئاماده‌بوونا ژماره‌كا سه‌ركرده‌یێن سیاسى و وه‌زیرێن ده‌رڤه‌ و نه‌فت و پیشه‌سازى و شیره‌تكارێ سامانێن سروشتى ل حكومه‌تا هه‌رێما كوردستانێ و ژماره‌كا شیره‌تكار و بسپۆرێن ته‌كنیكى و قانوونى كۆمبوونه‌ك بۆ دانوستاندكرنێ ل سه‌ر پرۆژه‌قانوونا نه‌فت و گازێ كر.

سوودانى داخوازا پێكئینانا لژنه‌یه‌كا وه‌زیران بۆ سه‌رپه‌رشتیكرنا دانوستاندنێن ته‌كنیكییێن دناڤبه‌را وه‌زاره‌تا نه‌فتا فیدرالى و وه‌زاره‌تا سامانێن سروشتییا حكومه‌تا هه‌رێما كوردستانێ كر، هه‌روه‌سا داخوازا به‌رهه‌ڤبوونا پارێزگارێن پارێزگه‌هێن به‌رهه‌مئینه‌رێن نه‌فتا به‌سره‌، میسان، كه‌ركووك، زیقار و رێڤه‌به‌رین گشتییێن كۆمپانییێن نه‌فتا وه‌لاتى بۆ دانوستاندنێن ته‌كنیكییێن به‌رده‌وام سه‌باره‌ت قانوونێ كر، ب مه‌رجه‌كى ئه‌و دیالۆگێن دێ هێنه‌كرن تمامكه‌رێن دیالۆگێن سیاسى و ب پێشكێشكرنا پرۆژه‌ قانوونێ د رازیبن.

دكۆمبوونێدا پێداچوون ل سه‌ر دووماهى ره‌شنڤیسێ پرۆژه‌قانوونێ هاته‌كرن، هووربینى بۆ وان برگه‌یان هاته‌كرن، یێن لژنه‌یا ته‌كنیكى و قانوونى كار ل سه‌ر كرى داكو بگه‌هنه‌ دووماهییا پرۆژه‌قانوونێ و ده‌ست ب ئاماده‌كارییێن په‌سه‌ندكرنێ ژلایێ جڤاتا وه‌زیرانڤه‌ بهێنه‌كرن، ره‌وانه‌ى جڤاتا نوونه‌ران بۆ رێپێدانێ د چارچووڤێ قانوونێ و ده‌ستووریدا بهێته‌كرن.