پشتی ئەزموونا سەرکەفتی یا پرۆژێن دارستانێن زانکۆیا دهۆکێ و کۆمبوونا شواتا ئەڤ سالە لدۆر چاندنا داران ل سەنتەرێ باژێرێ دهۆکێ و ب تایبەت ل هەردو چیایێن هنداڤا باژێری، د. عەلی تەتەر پارێزگارێ دهۆکێ، سەرپەرشتییا کۆمبوونەکێ ل گەل رێڤەبەری یێن پەیوەندیدار ب ئامادەبوونا رێکخراوا کرێکارێن نێڤدەولەتی ب مەرەما کەسکكرنا سەنتەرێ باژێرێ دهۆکێ و دەوروبەران ئەنجامدا.
پارێزگارێ دهۆکێ راگەهاند: پویتەپێدانا ژینگەهێ و چاندنا داروباران ئێک ژ ئەولەویاتێن کارێ مەیە و ل گەل سازی یێن پەیوەندیدار کار بۆ چاندنا داروباران ل هژمارەکا ئەردان دکەین ب تایبەتی ل هەردو چیایێن ل هنداڤ باژێرێ دهۆکێ بهێنە کەسکكرن، سۆپاسییا رێکخراوا کرێکارێن نێڤدەولەتی كر كو بەرهەڤییا خۆ دیارکری بۆ ئەنجامدانا ڤی پرۆژەیی. پارێزگارێ دهۆکێ د کۆمبوونێدا ب بەرهەڤبوونا رێڤەبەری یێن پەیوەندیدار بریار دا ١٠٠ دۆنەمێن ئەردی ل ئالۆکا و نزارکێ و گژەبەرا ب دو قووناغان بهێنە چاندن.
