ئاسۆ رۆسته‌م دێ رووبروو كریستیانۆ رۆنالدوى بیت

یاریكه‌رێ كورد یێ یانه‌یا شۆرته‌ ئاسۆ رۆسته‌م ئه‌ڤرۆ دێ رووبروو ستێرا پورتۆگالى كریستیانوى رۆنالدوى بیت.

ئه‌ڤرۆ ل ده‌مژمێر شه‌شى ئێڤارى هه‌ردوو یانه‌یێن شۆرته‌ یا عیراقى و نه‌سر یا سعوودى دێ ژ هه‌ڤركییێن قووناغا پێش دووماهییا كوپا شاهـ سه‌لمان یا یانه‌ییێن عه‌ره‌بى ل یاریگه‌ها مه‌حاله‌ ل باژێرێ ئه‌بها یێ سعوودى رووبروو ئێكبن.

ئاسۆ رۆسته‌مى دقووناغا چارێك دووماهییێدا ئاسته‌كێ بلند نیشاندا و سه‌ركێشییا تیما خوه‌ به‌ره‌ڤ تۆماركرنا سه‌ركه‌ڤتنه‌كا مه‌زن ل سه‌ر یانه‌یا سه‌د یا قه‌ته‌رى كر، كو دوێ یارییێ دا گۆل تۆماركربوون، دناڤ باشترین پێكهاتییێ وێ قووناغێدا هاتبوو دانان.

دقووناغا كۆمان ژى دا یاری به‌رامبه‌ر ستێرا فره‌نسى ل یانه‌یا ئیتیحاد كه‌ریم بنزێماى كربوو، هه‌ڤركێ وى یێ ڤێ جارێ ستێرا جیهانى كریستیانو رۆنالدویه‌ كو سه‌ركێشییا یانه‌یا نه‌سر دكه‌ت.

شۆرته‌ ب سه‌ركێشییا ئاسۆى دێ هه‌موو بزاڤان كه‌ت ئه‌نجامه‌كێ نه‌چاڤه‌رێكرى به‌رامبه‌ر كریستیانوى و هه‌ڤالێن وى تۆماربكه‌ت، و ل سه‌ر كیستێ وان پلێتا یارییا دووماهییێ ب ده‌ستڤه‌ببه‌ت.