بۆ جارا ئێکێ قوتابیەکی زانکۆیا زاخۆ ل پرۆگرامەکێ سەرکردایەتیێ ل ویلایەتێن ئێکگرتی یێن ئەمریکی دهێتە وەرگرتن

زانکۆیا زاخۆ ڕاگەهاندیە، ( ڤیان حمد حسێن) قوتابی ل قۆناغا سیێ پشکا ئەندازیاریا میکانیک ل کۆلیژا ئەندازیاری/ زانکۆیا زاخۆ، ئەڤە  بۆ دەمێ چەند ساڵایە قوتابیێ ناڤبری کارێ خۆبەخشیێ ئەنجام ددەت و پشکداری د چەندین خۆل و پرۆگراماندا کرییە ل سەر ئاستێ هەرێما کوردستانێ و عیراقێ و وەلاتێ ئوردن، بەلێ ژ ئەنجامێ بزاڤێن وی یێن بەردەوام شیا پشکدار ببیت د ئەوی پڕوگرامێ ژلایێ کۆنسلخانەیا ئەمریکی ل عیراقێ و رێکخراوا (World Learning)یا ناڤدەولەتیڤە هاتیە ڕێکخستن و برێڤەبرن.

دیارکریە ژی، قوتابی قەستا وەلاتێن ئێکگرتی یێن ئەمریکی کر و د ئەوی پرۆگرامیدا شیا چەندین شارەزای و زانیاریا دەربارەی سەرکردایەتیێ و هونەرێ ژیانێ و دانوستاندنێ لدەڤ خۆ پێشبێخیت، ژ لایەکی دیڤە قوتابیێ ناڤبری شیا فێری ڕەوشەنبیری و کەلتورێ گەلێ ولاتێ ئەمریکی ببیت و هەروەسان کەلتورێ کوردی ب گەلێ ئەمریک بدەتە ناسکرن.

زانکۆیا زاخۆ ئاماژە کریە، هەروەسا د پشکەکا دیدا قوتابی (ڤیان) بەحس ل شیان و ئاستێ زانستی یێن هەمی قوتابیێن پشکێن زانکۆیا زاخۆ کر دگەل پشکداربوویێن پرۆگرام و قوتابیێن جودا جودا ل زانکۆیێن ئەمریکی، ئەڤ چەندە ژی بوو جهێ دلخۆشیا پشکداربوویان و قوتابیان.

ل دوماهیێ ژی زانکۆیا زاخۆ ب ناڤێ سەرۆکاتیا زانکۆیێ گۆتیە؛”دەستخۆشیێ ل قوتابیێ خۆ دکەین و داخوازا سەرکەفتنێ و پلێن بلندتر بۆ دخازین.“