جڤاتا وهزیرێن ههرێما كوردستانێ ئهڤرۆ ب سهرپهرشتییا سهرۆكوهزیران مهسرور بارزانى و جێگرێ وى قوباد تالهبانى كۆمبوو، چهند برگه و بابهت هاتنه گوتوبێژكرن و پهسهندكرن.
د برگهیا ئێكێ یا كۆمبوونێدا، ئهنجامێن سهرهدانا شاندێ حكومهتا ههرێما كوردستانێ بۆ بهغدا هاتنه دیاركرن كو تایبهت بوون ب رهشنڤیسا پرۆژهقانوونا نهفت و گازا فیدرالى ب ههڤپشكى و پێكڤهییێ دناڤبهرا حكومهتا ههرێما كوردستانێ و حكومهتا عیراقێ و پارێزگههێن عیراقێ یێن كو بهرههمئینهرێن نهفت و گازێنه، داخواز هاتهكرن بۆ وێ چهندێ پشتبهستن ل سهر ماددهیێن دهستوورییێن گرێداى كهرتێ نهفت و گازێ بهێتهكرن.
سهرۆكوهزیران زێدهبارى دووپاتكرنا هندێ كو دڤێت ل دهمێ دانانا قانوونا نهفت و گازێ ل سهر ئاستێ عیراقا فیدرالى، ماددهیێن دهستوورییێن عیراقێ یێن تایبهت ب كهرتێ نهفت و گازێ ببنه بنهما و ههروهكو د دهستوورى ژى دا ب روونى هاتى، ئهڤ پرۆژه دڤێت ب رهزامهندییا حكومهتا فیدرالى و حكومهتا ههرێما كوردستانێ و پارێزگههێن بهرههمئینهرێن نهفتا عیراقێ بیت و رهنگڤهدانا بنهمایێن سیستهمێ فیدرالییێ بیت ههروهكو د دهستووریدا هاتییه جهگیركرن.
سهرۆكێ جڤاتا وهزیران دووپاتى ل هندێ ژى كر پێدڤییه رێز ل وان رێككهڤتنان بهێته گرتن یێن دناڤبهرا ههرێما كوردستانێ و حكومهتا فیدرالیدا یێن تایبهت ب مافێن دهستوورییێن ههرێما كوردستانێ هاتینه ئیمزاكرن.
جڤاتا وهزیران ژى دووپاتى ل گرنگییا ههبوونا قانوونا نهفت و گازێ ل سهر ئاستێ عیراقێ كر ب مهرجهكى ل دووڤ بنهمایێن رێكخستنا ئهڤى كهرتى بیت و سیستهمێ عیراقێ دڤێت یێ وهسا بیت وهكو د دهستووریدا هاتى.
دبرگهیا دووێ یا كارنامهیا كۆمبوونێدا، كوێستان محهمهد وهزیرا كار و كاروبارێن جڤاكى رهشنڤیسێ ( پهیرهوێ سندوقا چاڤدێرییا جڤاكى و شیاندنا كهسێن كێمئهندام و خۆدان پێدڤییێن تایبهت و كورتهبالایان )خواند، كو ل بهر قانوونا ژماره 22 یا سالا 2011ێ هاتییه ئامادهكرن و ئارمانج ژێ دهستبكاربوونا سندوقێیه ههتاكو داهاتهكى بۆ ڤى بوارى تێدا كۆمبكهن و جارهكا دى بۆ پێشكێشكرنا خزمهتگوزارییێن پێدڤى بۆ كهسێن كێمئهندام و خۆدان پێدڤییێن تایبهت و كورتهبالایان ب رێكا فهراههمكرنا چاڤدێری و شیاندن و گهشهپێدانا جڤاكی ب مهزێخن، پشتهڤانییا وان د ههموو بوارێن ئابوورى و جڤاكى و ساخلهمى و فێركارییێدا بكهن، جڤاتهك ژى بۆ ب رێڤهبرنا سندوقێ بهێته پێكئینان كو نوونهرێن رێكخراوێن كێمئهندامان و خۆدان پێدڤییێن تایبهت و كورتهبالایان ب خۆڤه بگریت و ئهوژى وهكو لایهنێن حكومهتێ بریاران ل سهر ب رێڤهبرنا سندوقێ بدهن.
پشتى دانوستاندنێ جڤاتا وهزیران ب بههرا پترا دهنگان ئهو پهیرهوه پهسهند كر و وهزارهتا كار و كاروبارێن جڤاكى راسپارد ب ههماههنگى دگهل وهزارهتێن پهیوهندار و رێكخراوان، رێكارێن پێدڤى پشتى بجهئینانا پهیرهوى وهربگرن.
