کولیلکا حەسکیفێ كلیپه‌كا نوو به‌لاڤ كر

ئاژانسا خانی:

خانما سترانبێژ و شانۆكار” کولیلکا حەسکیفێ، نووترین بەرهەمێ خۆ ب ناڤێ ‘ دلێ تە یێ بریندار’ ب شێوێ ڤیدیۆ کلیپ به‌لاڤ كرییه‌، هه‌تا نوكه‌ وێ پشكداری د سێ كورته‌ فلمان دا كرییه‌ و ل سالا بوری وێ كلیپا خۆ یا ئێكێ ب ناڤێ ” شامیرانێ ” به‌لاڤ كرییه‌.

چیچه‌ك ته‌كده‌میر” یا ناسیار ب كولیلکا حەسکیفێ، بۆ ئاژانسا خانی دیار كر” ئەڤ بەرهەمە به‌حسێ چیرۆکا دو عاشقێن گەنج دكه‌ت و مرن چیرۆكا وان ب دووماهی د ئینیت” ئه‌و بەرهەمە ژ په‌یڤێن محەمەد سەفایە و موزیکا وێ ژلایێ رەزا هەنارەیی هاتییه‌ چێكرن و كارێ وێنه‌گرتنێ ژ لایێ فەرهاد ئەمان” ل باژێرێ مێردینێ ل باکوورێ کوردستانێ هاتییه‌ وێنه‌ كرن.

ناڤهاتییێ گۆت ژی: نوكه‌ ئه‌و به‌رهه‌ڤییان بۆ تۆماركرنا بەرهەمه‌كێ نوو دكه‌ت و مژوولی تۆماركرنا وی به‌رهه‌مییه‌ و ئه‌و گه‌له‌ك حه‌ز ژ سترانێن هونه‌رمه‌ندێ نه‌مر محه‌مه‌د شێخۆیی دكه‌ت و دیسان گه‌له‌ك حه‌ز ژ گۆتنا سترانێن فولكلۆری دكه‌ت” كولیلك خەلکا حەسکیفێ یه‌ ل باکوورێ کوردستانێ و نوكه‌ ل باژێرێ باتمانێ دژیت، هه‌روه‌سا ده‌فێ ژی دژه‌نیت و هه‌تا نوكه‌ پشكداری د چه‌ندین شانۆگه‌رییان دا كرییه‌.