<h3 style="text-align: justify;"><span style="font-size: 18pt;">ل ئێڤارییا رۆژا شه‌مبى 19ى ته‌باخا 2023ێ ل باژێرێ دهۆكێ، سه‌رۆك مه‌سعوود بارزانى دگه‌ل رێكخستنین حزبییێن پارتى دیموكراتى كوردستان ل ده‌ڤه‌را بادینان كۆمبوو.</span></h3> <h3 style="text-align: justify;"><span style="font-size: 18pt;">د كۆمبوونێدا كو ب مه‌ره‌ما راگوهۆرینێ ل دۆر ئاریشه‌یێن وه‌لاتییان و ئاگه‌هداربوون ل ره‌وشا رێكخستنێن حزبى و دووڤچوونا ئه‌نجامێن كۆنگرێ 14ێ یێ پارتى هاتبوو كرن، سه‌رۆك بارزانى گوتاره‌ك پێشكێشى ئاماده‌بوویان كر.</span></h3> <h3 style="text-align: justify;"><span style="font-size: 18pt;">سه‌رۆك بارزانى دگوتارا خوه‌دا تیشك خسته سه‌ر ره‌وشا حزبێ و بریارێن كۆنگره‌یێ 14ێ یێ پارتى و ره‌وشا سیاسییا هه‌رێما كوردستانێ و رووبرووبوونا گه‌ف و ئاسته‌نگان د قووناغا نوكه و داهاتیدا، سه‌رۆك بارزانى زێده‌بارى ئاماژه‌دان ب هندێ كو د بابه‌تێ هه‌لبژارتناندا، پارتى هه‌ر ژ پشتى سه‌رهلدانێ بۆ كرنا هه‌لبژارتنان و شه‌رعییه‌تا شۆره‌شگێرى بۆ شه‌رعییه‌تا دستوورى ده‌ستپێشخه‌ربوویه، دووپاتى ل هندێ ژى كر، پێدڤییه به‌ره‌ڤ هه‌لبژارتنان بچن و دڤێت پارتى باوه‌رییا گه‌لى بپارێزیت، ئه‌وژى ئاشكراكر، هه‌ر كه‌س و لایه‌نه‌كێ به‌رژه‌وه‌ندییێن كوردستانێ بخوازیت، چ جاران ئاسته‌نگان بۆ پرۆسه‌یا هه‌لبژارتنان دروست ناكه‌ت، سه‌رۆك بارزانى ئه‌وژى دووپاتكر، دڤێت لایه‌نێن سیاسى سه‌ربارى جوداهییان ل سه‌ر هێلێن نه‌ته‌وه‌یى و نیشتیمانى و پاراستنا قه‌واره‌یێ هه‌رێمێ دكۆك و هه‌ڤرابن.</span></h3> <h3 style="text-align: justify;"><span style="font-size: 18pt;">سه‌رۆك بارزانى د درێژاهییا ئاخڤتنێن خوه‌دا رووناهى خسته سه‌ر په‌یوه‌ندییێن دناڤبه‌را هه‌رێما كوردستانێ و عیراقا فیدرالدا و كورتییه‌ك ژ مێژوویا وان په‌یوه‌ندییان د 20 سالێن بووریدا به‌حسكر و دووپاتكر، داكو عیراق بشێت یا سه‌قامگیر بیت، دڤێت هه‌موو لایه‌ك پابه‌ندبوون ب ده‌ستوور و پره‌نسیپێن شه‌راكه‌ت و هه‌ڤسه‌نگی و ته‌وافقێ به‌رچاڤ وه‌ربگریت.</span></h3> <h3 style="text-align: justify;"><span style="font-size: 18pt;">هه‌ر دوێ كۆمبوونێدا سه‌رۆك بارزانى داخوازكر، كار بۆ كوورتركرنا هه‌ستێ نیشتیمانپه‌روه‌رى دناڤ گه‌نجاندا و هۆشیاركرنا وه‌لاتییان ژ گه‌فان و پشته‌ڤانیكرنا حكومه‌تا هه‌رێما كوردستانێ بهێته‌كرن.</span></h3> <h3 style="text-align: justify;"><span style="font-size: 18pt;">پشتى ئاخڤتنا سه‌رۆك بارزانى، ده‌رگه‌هێ دانوستاندن و پرسیار و ره‌خنه و تێبینییان بۆ ئاماده‌بوویێن كۆمبوونێ هاته ڤه‌كرن، سه‌رۆك بارزانى به‌رسڤ و به‌رچاڤ روونییێن پێدڤى بۆ ئاماده‌بوویان دیاركرن.</span></h3>
