<h3 style="text-align: justify;"><span style="font-size: 18pt;">ئه‌ندامه‌كێ جڤاتا نوونه‌رێن عیراقێ راگه‌هاند، سوبه‌هى دوو شاندێن حكومه‌تا هه‌رێما كوردستانێ دێ سه‌ره‌دانا به‌غدا كه‌ن و دانوستاندنێ ل سه‌ر بابه‌تێن گرنگ كه‌ن.</span></h3> <h3 style="text-align: justify;"><span style="font-size: 18pt;">چیایى ته‌یمۆر ئه‌ندامێ جڤاتا نوونه‌رێن عیراقێ ژ فراكسیۆنا پارتى بۆ ئاژانسا خانى ئاشكراكر، سوبه‌هى دوو شاند ژ حكومه‌تا هه‌رێما كوردستانێ دێ سه‌ره‌دانا به‌غدا كه‌ن، شانده‌ك یێ ته‌كنیكییه و دێ بۆ دانانا ره‌شنڤیسێ قانوونا نه‌فت و غازێ و ئه‌و ئاریشه و تێبینییێن دوێ قانوونێدا هه‌ین سه‌ره‌دانێ كه‌ت، شاندێ دى ژى ل دۆر بابه‌تێ چه‌وانییا بجهئینانا قانوونا بودجه‌ى سه‌ره‌دانێ كه‌ت.</span></h3> <h3 style="text-align: justify;"><span style="font-size: 18pt;">زێده‌تر چیایى ته‌یمۆرى ئاشكراكر، دنوكه‌دا هه‌رێما كوردستانێ رۆژانه 85 هزار به‌رمیلان راده‌ستى به‌غدا دكه‌ت، حكومه‌تا هه‌رێمێ یا به‌رهه‌ڤه ل دووڤ وێ رێككه‌ڤتنا دگه‌ل به‌غدا كرى، رۆژانه 400 هزار به‌رمیلان راده‌ست بكه‌ت، لێ حكومه‌تا فیدرالى ژبه‌ر وان ناكوكییێن دگه‌ل توركیا هه‌ین، نه‌شێت رۆژانه وێ هژمارا به‌رمیلان وه‌ربگریت، كو حكومه‌تا توركیا چه‌ند مه‌رج بۆ هنارتنا په‌ترۆلێ ب رێكا به‌نده‌رێ جه‌یهان چه‌ند مه‌رج داناینه به‌ر عیراقێ ئه‌وژى، دڤێت عیراق ل وان قه‌رێن ل سه‌ر توركیا هه‌ین خووش بیت كو توركیا ب ئێك ملیار و 500 ملیۆن دۆلاران قه‌ردارا عیراقێ یه، دڤێت نه‌فتێ ب رێژه‌یه‌كا ئه‌رزانتر ژ بازارى بده‌ته توركیا و دڤێت عیراق بۆ هه‌ر به‌رمیله‌كا ب رێكا به‌نده‌رێ جه‌یهان هنارده دكه‌ت حه‌فت دۆلاران بده‌ته توركیا.</span></h3> <h3 style="text-align: justify;"><span style="font-size: 18pt;">سه‌باره‌ت مووچه‌یێ فه‌رمانبه‌ران دیاركر، چ ئاریشه ل دۆر هنارتنا مووچه‌ى نینن، ب پێشبینییا وان مووچه‌یێ هه‌یڤێن بهێن دێ هێنه هنارتن.</span></h3>
